کراچی کے علاقے گلشن معمار میں پولیس نے کامیاب کارروائی کرتے ہوئے رکشے چھیننے میں ملوث چار رکنی منظم ڈکیت گینگ کو گرفتار کر لیا۔ ملزمان کے قبضے سے چھینے گئے تین رکشے اور مختلف گاڑیوں کی چھ نمبر پلیٹس بھی برآمد کر لی گئی ہیں۔
پولیس کے مطابق کارروائی خفیہ اطلاع پر غنی آباد کے قریب کی گئی، جہاں چاروں ملزمان کو گرفتار کیا گیا۔ ابتدائی تحقیقات میں انکشاف ہوا کہ ملزمان اسلحے کے زور پر شہریوں سے رکشے چھینتے تھے اور بعد ازاں انہیں کھول کر ان کے اسپیئر پارٹس مختلف مارکیٹوں میں فروخت کر دیتے تھے۔
پولیس کا کہنا ہے کہ برآمد ہونے والے رکشے کراچی کے مختلف علاقوں، جن میں تھانہ سچل، لیاقت آباد اور قیوم آباد شامل ہیں، کی حدود سے چھینے گئے تھے۔ ملزمان سے برآمد ہونے والی چھ مختلف نمبر پلیٹس بھی قبضے میں لے لی گئی ہیں، جنہیں وارداتوں کے دوران شناخت چھپانے کے لیے استعمال کیا جاتا تھا۔
پولیس نے گرفتار ملزمان کے خلاف مقدمہ درج کر کے مزید تفتیش شروع کر دی ہے۔ حکام کے مطابق گینگ کے ممکنہ دیگر ساتھیوں، خریداروں اور سہولت کاروں کی گرفتاری کے لیے بھی کارروائیاں جاری ہیں۔
پولیس کا کہنا ہے کہ شہر میں اسٹریٹ کرائم کی روک تھام کے لیے انٹیلی جنس بیسڈ آپریشنز کا سلسلہ جاری رہے گا تاکہ شہریوں کے جان و مال کا تحفظ یقینی بنایا جا سکے۔
گلشن معمار میں رکشے چھیننے والا 4 رکنی ڈکیت گینگ گرفتار
