وزیرِ اعظم محمد شہباز شریف سے کروشیا کے وزیر خارجہ ڈاکٹر گورڈن گرلیچ ریڈمین نے اسلام آباد میں ملاقات کی اور دوطرفہ تعلقات پرتبادلہ خیال کیا۔
وزیراعظم نے کروشیا کے وزیر خارجہ اور ان کے وفد کاخیرمقدم کرتے ہوئےکہا کہ دونوں ملکوں کےدوستانہ تعلقات باہمی احترام اور مشترکہ مفادات پر مبنی ہیں۔ محمدشہبازشریف نے پاکستان اور کروشیا کے درمیان تجارت ،سرمایہ کاری، انفارمیشن ٹیکنالوجی، زراعت، سیاحت ،ہنرمند افرادی قوت اوروابط کے فروغ سمیت مختلف شعبوں میں دوطرفہ تعاون کو مزید فروغ دینے کی خواہش کا اظہار کیا۔وزیراعظم نے کروشیا کے صدر زوران میلانوویچ اور وزیراعظم آندرے پلینکوویچ کے لیے نیک تمناؤں کا اظہار کرتے ہوئےدورہ پاکستان کی دعوت دی۔
وزیر خارجہ ڈاکٹر گورڈن گرلیچ ریڈمین نے پرتپاک استقبال پر شکریہ ادا کرتے ہوئے کہا کہ اسلام آباد کا دورہ ان کے لیے اعزاز ہے۔ انہوں نے علاقائی امن کی کوششوں میں پاکستانی قیادت کے نمایاں کردار کو سراہا۔کروشیا کے وزیرخارجہ نے باہمی دلچسپی کے تمام شعبوں میں دوطرفہ تعلقات کو مزید وسعت دینے کی اپنی حکومت کی خواہش کا اظہار کیا۔