فیلڈ مارشل سید عاصم منیر اور ایران کے وزیر خارجہ عباس عراقچی کے درمیان ٹیلیفونک رابطہ ہوا، جس میں خطے کی موجودہ سیکیورٹی صورتحال، حالیہ پیش رفت اور بڑھتی ہوئی کشیدگی پر تفصیلی تبادلہ خیال کیا گیا۔
ایرانی سرکاری میڈیا کے مطابق عباس عراقچی نے گفتگو کے دوران ایران کے خلاف ہونے والے امریکی حملوں کی شدید مذمت کرتے ہوئے انہیں خطے کے امن و استحکام کے لیے خطرہ قرار دیا۔ انہوں نے اس بات پر زور دیا کہ موجودہ حالات میں کشیدگی کم کرنے اور مسائل کے حل کے لیے سفارتی ذرائع کو ترجیح دی جانی چاہیے۔
دونوں رہنماؤں نے خطے میں پیدا ہونے والی صورتحال اور اس کے ممکنہ اثرات پر بھی گفتگو کی۔ ایرانی میڈیا کے مطابق رابطے کے دوران علاقائی سلامتی اور امن برقرار رکھنے سے متعلق مختلف امور زیر بحث آئے۔
دوسری جانب ایرانی وزیر خارجہ عباس عراقچی نے عمان کے وزیر خارجہ بدر بن حمد البوسعیدی اور ترکیہ کے وزیر خارجہ حاقان فیدان سے بھی علیحدہ علیحدہ ٹیلیفونک رابطے کیے۔
ایرانی وزارت خارجہ کے مطابق ان گفتگوؤں میں آبنائے ہرمز کی تازہ صورتحال، خطے میں جاری کشیدگی اور دیگر اہم علاقائی معاملات پر تبادلہ خیال کیا گیا۔ تینوں وزرائے خارجہ نے اس بات پر اتفاق کیا کہ موجودہ حالات میں کشیدگی میں مزید اضافے سے بچنے کے لیے سفارتی رابطوں اور مذاکرات کا سلسلہ جاری رکھنا انتہائی ضروری ہے۔
ترک وزارت خارجہ کی جانب سے جاری بیان میں کہا گیا کہ وزیر خارجہ حاقان فیدان نے عباس عراقچی کے ساتھ گفتگو میں خطے کی موجودہ صورتحال اور جنگ بندی سے متعلق امور پر تبادلہ خیال کیا۔ انہوں نے امن و استحکام کے لیے سفارتی کوششوں کی اہمیت پر بھی زور دیا۔
یہ سفارتی رابطے ایسے وقت میں سامنے آئے ہیں جب مشرق وسطیٰ میں حالیہ کشیدگی کے باعث عالمی برادری مسلسل تحمل، مذاکرات اور سفارتی حل پر زور دے رہی ہے تاکہ خطے میں امن و استحکام برقرار رکھا جا سکے۔
فیلڈ مارشل عاصم منیر اور ایرانی وزیر خارجہ عباس عراقچی کا ٹیلیفونک رابطہ، خطے کی صورتحال پر تبادلہ خیال
