بلوچستان کے ضلع واشک کی تحصیل ماشکیل میں نامعلوم مسلح افراد کی فائرنگ کے نتیجے میں پانچ مزدور جاں بحق ہو گئے۔ واقعے کے بعد علاقے میں خوف و ہراس پھیل گیا جبکہ پولیس نے تحقیقات کا آغاز کر دیا ہے۔
پولیس کے مطابق حملہ آوروں نے ایک دکان پر کام کرنے والے مزدوروں کو نشانہ بنایا اور اندھا دھند فائرنگ کی، جس کے نتیجے میں پانچوں افراد موقع پر ہی جان کی بازی ہار گئے۔ ابتدائی معلومات کے مطابق جاں بحق ہونے والے تمام افراد کا تعلق بلوچستان سے نہیں تھا بلکہ وہ روزگار کی غرض سے دیگر صوبوں سے ماشکیل آئے ہوئے تھے۔
قانون نافذ کرنے والے اداروں نے جائے وقوعہ کو گھیرے میں لے کر شواہد اکٹھے کرنا شروع کر دیے ہیں، جبکہ واقعے کے مختلف پہلوؤں کا جائزہ لیا جا رہا ہے۔ پولیس کا کہنا ہے کہ ضروری قانونی کارروائی مکمل کرنے کے بعد مقتولین کی میتیں ان کے آبائی علاقوں کو روانہ کی جا رہی ہیں۔
دوسری جانب وزیراعلیٰ بلوچستان کے معاون خصوصی شاہد رند نے واقعے کی شدید مذمت کرتے ہوئے کہا کہ حکومت نے اس افسوسناک واقعے کا فوری نوٹس لے لیا ہے اور مکمل تحقیقات کا حکم دے دیا گیا ہے۔
انہوں نے کہا کہ بے گناہ شہریوں کے قتل میں ملوث عناصر کو ہر صورت قانون کے کٹہرے میں لایا جائے گا اور کسی کو بھی قانون سے بالاتر نہیں سمجھا جائے گا۔ شاہد رند نے متاثرہ خاندانوں سے اظہارِ تعزیت کرتے ہوئے یقین دلایا کہ حکومت دکھ کی اس گھڑی میں ان کے ساتھ کھڑی ہے اور واقعے کے ذمہ داروں کو انصاف کے کٹہرے تک پہنچایا جائے گا۔
واشک میں مسلح افراد کی فائرنگ، دکان پر کام کرنے والے 5 مزدور جاں بحق
