امریکی شہر سیئٹل میں اتوار کو ہونے والی خونریز فائرنگ کے سلسلے میں 15 سالہ نوجوان کو حراست میں لے لیا گیا ہے۔ امریکی خبر رساں ادارے ایسوسی ایٹڈ پریس کے مطابق پولیس کا کہنا ہے کہ واقعے میں کم از کم تین افراد نے فائرنگ کی، جن میں ایک 19 سالہ نوجوان بھی شامل تھا جو موقع پر ہی ہلاک ہو گیا۔
عدالت میں جمع کرائی گئی پولیس دستاویزات کے مطابق تفتیش کاروں کا خیال ہے کہ فائرنگ میں 15 سالہ زیر حراست ملزم، اس کا ایک ساتھی جو ہلاک ہو چکا ہے، اور کم از کم ایک نامعلوم مسلح شخص ملوث تھا۔ پولیس مزید ملزمان کی تلاش اور واقعے کی مختلف پہلوؤں سے تحقیقات کر رہی ہے۔
سیئٹل پولیس کی اسسٹنٹ چیف آف انویسٹی گیشنز نیکول پاول نے پریس کانفرنس میں بتایا کہ ابتدائی شواہد سے ظاہر ہوتا ہے کہ فائرنگ کا واقعہ ممکنہ طور پر گینگ دشمنی کا نتیجہ تھا، جہاں دو گروہوں نے ایک دوسرے پر اندھا دھند گولیاں چلائیں۔
حکام کے مطابق اس فائرنگ میں تین افراد ہلاک ہوئے، جن میں 19 سالہ مبینہ شوٹر کے علاوہ 56 سالہ خاتون اور 44 سالہ مرد بھی شامل ہیں۔ دونوں شہری فائرنگ کی زد میں آ کر جان کی بازی ہار گئے۔
پولیس کا کہنا ہے کہ فائرنگ کے دوران کم از کم سات، جبکہ ممکنہ طور پر آٹھ افراد گولیوں کی زد میں آئے۔ زخمیوں میں مختلف عمر کے افراد شامل ہیں، جنہیں فوری طور پر اسپتال منتقل کیا گیا۔
حکام نے واضح کیا ہے کہ فی الحال عوام کے لیے کسی مسلسل خطرے کی اطلاع نہیں ہے، تاہم واقعے میں ملوث دیگر مشتبہ افراد کی تلاش جاری ہے۔ کنگ کاؤنٹی میڈیکل ایگزامنر اور قانون نافذ کرنے والے ادارے واقعے کی مکمل تحقیقات کر رہے ہیں تاکہ فائرنگ کے محرکات اور تمام ذمہ داران کا تعین کیا جا سکے۔
سیئٹل فائرنگ: 15 سالہ نوجوان حراست میں، واقعہ گینگ دشمنی کا نتیجہ قرار
