بھارت کی قومی فضائی کمپنی ائیر انڈیا نے سابق ایتھوپین ائیرلائنز کے سربراہ ٹیولڈے گیبریماریم کو اپنا نیا چیف ایگزیکٹو آفیسر (سی ای او) مقرر کرنے کا اعلان کر دیا ہے۔
ٹیولڈے گیبریماریم ایک دہائی سے زائد عرصے تک ایتھوپین ائیرلائنز کی قیادت کرتے رہے، جہاں ان کی سربراہی میں کمپنی نے نمایاں ترقی کرتے ہوئے افریقا کے سب سے بڑے ائیرلائن گروپ کی حیثیت حاصل کی۔انہوں نے اپنے دورِ قیادت میں 2019 کے بوئنگ 737 میکس طیاروں کے حادثات اور کورونا وبا جیسے غیر معمولی چیلنجز کے دوران بھی ایتھوپین ائیرلائنز کی کامیاب انداز میں رہنمائی کی، جس پر انہیں عالمی فضائی صنعت میں ایک تجربہ کار منتظم کے طور پر تسلیم کیا جاتا ہے۔ٹیولڈے گیبریماریم، موجودہ سی ای او کیمبل ولسن کی جگہ سنبھالیں گے۔ کیمبل ولسن کو 2022 میں ٹاٹا گروپ نے ائیر انڈیا کی بحالی اور جدید خطوط پر استوار کرنے کے لیے مقرر کیا تھا، جبکہ وہ 30 ستمبر 2026 کو اپنے عہدے سے سبکدوش ہو جائیں گے۔