عالمی اور مقامی مارکیٹ میں سونے کی قیمتوں میں اضافے کا سلسلہ جاری ہے، جہاں مسلسل تیسرے روز بھی فی تولہ سونے کی قیمت میں نمایاں اضافہ ریکارڈ کیا گیا ہے۔
آل پاکستان صرافہ جیمز اینڈ جیولرز ایسوسی ایشن کے مطابق جمعہ کے روز 24 قیراط فی تولہ سونے کی قیمت میں مزید 5 ہزار 100 روپے کا اضافہ ہوا، جس کے بعد ملک میں فی تولہ سونا 4 لاکھ 54 ہزار 336 روپے کی نئی سطح پر پہنچ گیا۔
اسی طرح 10 گرام 24 قیراط سونے کی قیمت میں 4 ہزار 372 روپے کا اضافہ ریکارڈ کیا گیا، جس کے بعد نئی قیمت 3 لاکھ 89 ہزار 519 روپے ہو گئی۔
اعداد و شمار کے مطابق گزشتہ تین روز کے دوران فی تولہ سونے کی قیمت مجموعی طور پر 26 ہزار 400 روپے بڑھ چکی ہے، جبکہ صرف گزشتہ دو روز میں ہی سونے کے نرخ 21 ہزار 300 روپے فی تولہ اضافے کے ساتھ نمایاں طور پر بلند ہوئے تھے۔
چاندی کی قیمت میں بھی اضافہ دیکھنے میں آیا۔ صرافہ ایسوسی ایشن کے مطابق فی تولہ چاندی 280 روپے مہنگی ہو کر 6 ہزار 939 روپے تک پہنچ گئی۔
دوسری جانب عالمی مارکیٹ میں بھی سونے کی قیمتوں میں تیزی برقرار رہی۔ بین الاقوامی بلین مارکیٹ میں فی اونس سونے کی قیمت مزید 51 ڈالر اضافے کے بعد 4 ہزار 319 ڈالر تک جا پہنچی۔
ماہرین کے مطابق عالمی معاشی غیر یقینی صورتحال، سرمایہ کاروں کا محفوظ سرمایہ کاری کی جانب بڑھتا رجحان اور بین الاقوامی مالیاتی حالات سونے کی قیمتوں میں اضافے کی بڑی وجوہات ہیں۔ ان کا کہنا ہے کہ اگر عالمی منڈی میں یہی رجحان برقرار رہا تو آئندہ دنوں میں سونے کی قیمتوں میں مزید اتار چڑھاؤ دیکھنے کو مل سکتا ہے۔
ملکی صرافہ بازاروں میں قیمتوں میں مسلسل اضافے کے باعث زیورات کی خریداری متاثر ہونے کا امکان بھی ظاہر کیا جا رہا ہے، جبکہ سرمایہ کار سونے کو بدستور محفوظ سرمایہ کاری تصور کرتے ہوئے اس میں دلچسپی لے رہے ہیں۔
سونے کی قیمت میں مسلسل تیسرے روز بڑا اضافہ
