آزاد کشمیر اسمبلی میں اسپیکر اور ڈپٹی اسپیکر کے انتخاب کے لیے مسلم لیگ (ن) اور پاکستان پیپلز پارٹی نے اپنے امیدواروں کے نام حتمی کر دیے ہیں، جبکہ دونوں جماعتوں کی جانب سے امیدواروں کے کاغذات نامزدگی بھی ایوان میں جمع کرا دیے گئے ہیں۔
مسلم لیگ (ن) کے قائد میاں محمد نواز شریف نے اسپیکر کے بعد ڈپٹی اسپیکر کے امیدوار کے نام کی بھی منظوری دے دی ہے۔ مسلم لیگ (ن) کی جانب سے احمد رضا قادری کو ڈپٹی اسپیکر کا امیدوار نامزد کیا گیا ہے، جبکہ چوہدری طارق فاروق پہلے ہی اسپیکر کے امیدوار کے طور پر نامزد کیے جا چکے ہیں۔
مسلم لیگ (ن) آزاد کشمیر کے صدر شاہ غلام قادر نے اسپیکر اور ڈپٹی اسپیکر کے امیدواروں کے ناموں کی منظوری کی تصدیق کرتے ہوئے کہا ہے کہ پارٹی کو دونوں عہدوں کے انتخاب میں واضح اکثریت حاصل ہے اور مسلم لیگ (ن) کے امیدوار باآسانی کامیاب ہونے کی پوزیشن میں ہیں۔
دوسری جانب پاکستان پیپلز پارٹی نے اسپیکر کے لیے چوہدری قاسم مجید جبکہ ڈپٹی اسپیکر کے لیے عامر غفار لون کو امیدوار نامزد کیا ہے پیپلز پارٹی کے امیدواروں کے کاغذات نامزدگی بھی اسمبلی میں جمع کرا دیے گئے ہیں۔
آزاد کشمیر اسمبلی میں مسلم لیگ (ن) کے نو منتخب ارکان کی تعداد 31 ہے، جبکہ عوامی دست و بازو کے نو منتخب رکن ساجد اقبال کی حمایت کے بعد ن لیگ کے ارکان کی مجموعی تعداد 32 ہو گئی ہےپیپلز پارٹی کے پاس اسمبلی میں 14 نو منتخب ارکان ہیں، اسپیکر اور ڈپٹی اسپیکر کے انتخاب کے لیے ایوان میں 27 ارکان کی حمایت درکار ہے،پارٹی ذرائع کے مطابق چوہدری طارق فاروق اسپیکر منتخب ہونے کے بعد قائم مقام صدر آزاد کشمیر کی ذمہ داریاں بھی سنبھالیں گے۔