چکوال میں دم کروانے کے لیے پیر کے ڈیرے پر آنے والی 12 سالہ بچی کو مبینہ طور پر زیادتی کا نشانہ بنانے کا واقعہ سامنے آیا ہے۔ متاثرہ بچی کے اہلخانہ نے پیر پر سنگین الزام عائد کرتے ہوئے تھانہ لاوہ میں مقدمہ درج کرا دیا ہے۔
اہلخانہ کے مطابق بچی اپنے بھائی کے ہمراہ دم کروانے کے لیے پیر کے ڈیرے پر گئی تھی۔ متاثرہ بچی نے الزام عائد کیا کہ پیر نے اسے اسلحے کے زور پر مبینہ زیادتی کا نشانہ بنایا اور واقعے کے بارے میں کسی کو بتانے کی صورت میں جان سے مارنے کی دھمکی دی۔
پولیس کے مطابق بچی کو اس کا بھائی دم کروانے کے لیے پیر کے ڈیرے پر لے کر آیا تھا۔ مبینہ طور پر پیر نے انہیں بتایا کہ دم شام کے وقت کیا جائے گا، تاہم شام گزرنے کے بعد رات ہوگئی۔ کھانے کے بعد بچی کو الگ کمرے میں سونے کے لیے بھیج دیا گیا۔
پولیس کے مطابق کچھ دیر بعد پیر مبینہ طور پر بچی کے کمرے میں داخل ہوا اور اسے زبردستی زیادتی کا نشانہ بنایا۔ متاثرہ بچی نے بعد ازاں واقعے سے اپنے اہلخانہ کو آگاہ کیا، جس کے بعد وہ اسے لے کر پولیس کے پاس پہنچے اور قانونی کارروائی کی درخواست دی۔
پولیس نے متاثرہ بچی کے اہلخانہ کی درخواست پر مقدمہ درج کرلیا ہے جبکہ واقعے کی مزید تفتیش جاری ہے۔ متاثرہ بچی کا طبی معائنہ بھی کرایا جا رہا ہے اور پولیس کی جانب سے شواہد اکٹھے کرکے واقعے کے تمام پہلوؤں کی تحقیقات کی جارہی ہیں۔