آزاد کشمیر میں مسلم لیگ ن کے نامزد وزیراعظم بیرسٹر افتخار گیلانی کا پہلا ویڈیو پیغام سامنے آگیا۔ انہوں نے کہا ہے کہ ان شاء اللہ آزاد کشمیر میں ترقی اور خوشحالی کا نیا دور شروع ہوگا۔
بیرسٹر افتخار گیلانی کا کہنا تھا کہ مسلم لیگ ن جب بھی پاکستان یا آزاد کشمیر میں اقتدار میں آئی، اس نے تعمیر و ترقی کا نیا دور شروع کیا اور عوام کے حقوق کا تحفظ کیا۔
انہوں نے کہا کہ آزاد کشمیر میں حکومت کا ترقیاتی وژن وفاقی حکومت اور پنجاب حکومت کے ویژن سے ہم آہنگ ہوگا۔ شہباز شریف کی وفاقی حکومت اور مریم نواز کی پنجاب حکومت کی طرز پر آزاد کشمیر میں بھی ترقیاتی منصوبے شروع کیے جائیں گے۔
نامزد وزیراعظم نے کہا کہ آزاد کشمیر میں بھی تعمیر و ترقی کا وہی ماڈل اپنایا جائے گا جو وفاق اور پنجاب میں جاری ہے، جبکہ عوامی حقوق کا تحفظ اور علاقے کی تعمیر و ترقی نئی حکومت کی اولین ترجیحات میں شامل ہوں گی۔