کرپشن معاشرے کا ناسور بن چکی ہے ،اس کے خلاف بلاامتیاز کارروائی جاری ہے،عظمیٰ بخاری

وزیر اطلاعات پنجاب عظمیٰ بخاری نے کہا ہے کہ وزیراعلیٰ مریم نواز نے کرپشن کے خلاف جہاد کا اعلان کر رکھا ہے اور پنجاب کے تمام محکموں سے بدعنوانی کا خاتمہ ان کا مشن ہے،کرپشن معاشرے کا ناسور بن چکی ہے اور اس کے خلاف بلاامتیاز کارروائی جاری ہے-

اپنے بیان میں عظمیٰ بخاری نے کہا کہ پنجاب میں کرپشن کے خلاف جاری کریک ڈاؤن کے دوران اب تک 54 افسران اور اہلکار معطل یا ملازمت سے برخاست کیے جاچکے ہیں، صرف محکمہ خوراک میں 48 افسران و اہلکار گرفتار کیے گئے، جبکہ 6 ملازمین کو ملازمت سے برخاست کیا گیا اور 14 فوڈ کنٹرولرز کے خلاف تادیبی کارروائی جاری ہے۔

عظمیٰ بخاری کے مطابق وکٹوریہ اسپتال بہاولپور کی پارکنگ میں اوور چارجنگ پر ٹھیکیدار کو گرفتار کیا گیا، جبکہ چیچہ وطنی ٹی ایچ کیو اسپتال میں اوور چارجنگ کا ٹھیکہ منسوخ کردیا گیا ہے،کرپشن معاشرے کا ناسور بن چکی ہے اور اس کے خلاف بلاامتیاز کارروائی جاری ہے، کسی کو بھی سیاسی یا ذاتی بنیاد پر نشانہ نہیں بنایا جائے گا،عوام کرپشن کے خاتمے کے لیے مریم نواز کے ساتھ ہیں اور پنجاب میں جاری کریک ڈاؤن کو عوام کی جانب سے بھرپور پذیرائی مل رہی ہے۔

عظمیٰ بخاری کا کہنا تھا کہ مریم نواز نے جو بھی فیصلہ کیا، اس پر عمل درآمد یقینی بنایا ہے، انہوں نے کبھی تنقید اور منفی پروپیگنڈے کی پرواہ نہیں کی،جھوٹے پروپیگنڈے اور ذاتی تنقید نے مریم نواز کو کمزور کرنے کے بجائے چٹان کی طرح مزید مضبوط کیا ہے۔