گھوٹکی (باغی ٹی وی نامہ نگار مشتاق علی لغاری) گھوٹکی میں عدالت کے احاطے کے اندر مبینہ جھگڑے کا واقعہ پیش آیا، جس کے بعد اے سیکشن پولیس نے فوری کارروائی کرتے ہوئے ملڻ شر سمیت پانچ افراد کو گرفتار کرلیا۔
ذرائع کے مطابق عدالت کے احاطے میں جھگڑے کی اطلاع ملتے ہی اے سیکشن پولیس موقع پر پہنچ گئی اور صورتحال کو قابو میں کرتے ہوئے مبینہ طور پر جھگڑے میں ملوث پانچ افراد کو حراست میں لے لیا۔گرفتار افراد میں ملڻ شر کا نام بھی سامنے آیا ہے، جبکہ دیگر گرفتار افراد کے نام اور واقعے سے متعلق مکمل تفصیلات پولیس کی جانب سے تاحال باضابطہ طور پر جاری نہیں کی گئیں۔پولیس کے مطابق گرفتار افراد سے تفتیش جاری ہے۔ واقعے کی اصل وجہ، جھگڑے کے محرکات اور اس سلسلے میں کون سی قانونی دفعات عائد کی گئی ہیں، اس بارے میں مزید معلومات تحقیقات مکمل ہونے کے بعد سامنے آنے کا امکان ہے۔
عدالت جیسے حساس اور اہم مقام کے احاطے میں مبینہ جھگڑے کے واقعے نے سیکیورٹی انتظامات پر بھی سوالات اٹھا دیے ہیں۔ شہریوں کا کہنا ہے کہ عدالت میں آنے والے سائلین، وکلا اور دیگر افراد کے تحفظ کے لیے مؤثر سیکیورٹی انتظامات کو یقینی بنایا جانا چاہیے۔