وزیرِاعظم شہباز شریف نے مشرقِ وسطیٰ کی کشیدگی کے باعث مہنگے پیٹرول کے پیشِ نظرعوام پر بوجھ کم کرنے کے لیے موٹرسائیکل، رکشہ اور چھوٹی گاڑیوں پر 100 روپے فی لیٹر کی ’خصوصی ریلیف اسکیم‘ کا اعلان کر دیا ہے۔
وزیرِ اعظم محمد شہباز شریف نے غریب اور متوسط طبقے کو ہنگامی بنیادوں پر ریلیف فراہم کرنے کا فیصلہ کیا ہےاسکیم کا باقاعدہ اجراء کرتے ہوئے ان کا کہنا تھا کہ حکومت کو عوام کی معاشی مشکلات کا بخوبی احساس ہے اور ہم مشکل کی اس گھڑی میں اپنی عوام کو تنہا نہیں چھوڑیں گے۔
اس ‘خصوصی ریلیف سکیم’ کے تحت روزمرہ سفر کرنے والے کم آمدنی والے طبقے کو براہِ راست فائدہ پہنچایا جائے گاحکومت کی جانب سے موٹر سائیکل، رکشہ، چنگچی اور 800 سی سی تک کی چھوٹی گاڑیاں استعمال کرنے والوں کو پیٹرول کی خریداری پر 100 روپے فی لیٹر کی نمایاں رعایت دی جائے گی۔
حکومتی اعلان کے مطابق، موٹر سائیکل اور رکشہ سمیت دو اور تین پہیوں والی سواریوں کے لیے ماہانہ 20 لیٹر تک پیٹرول پر ریلیف دیا جائے گا۔ اسی طرح 800 سی سی تک کی چھوٹی گاڑیوں کے مالکان کے لیے ماہانہ 30 لیٹر پیٹرول پر اس سبسڈی کا اطلاق ہوگا۔
وفاقی دارالحکومت اسلام آباد کی حدود میں اس سکیم پر عمل درآمد آئندہ پیر اور منگل کی درمیانی شب سے کر دیا جائے گا دوسری جانب آزاد کشمیر اور گلگت بلتستان سمیت ملک بھر میں اس کا باقاعدہ اطلاق بدھ اور جمعرات کی درمیانی شب سے ہوگا۔
وزیرِ اعظم نے بتایا کہ اس سکیم سے مستفید ہونے کے لیے رجسٹریشن کا عمل آج سے شروع کر دیا گیا ہے، جبکہ طریقہ کار سے متعلق عوام کو ایک وسیع آگاہی مہم کے ذریعے رہنمائی فراہم کی جائے گی،اس موقع پر انہوں نے موٹر سائیکل، رکشہ اور گاڑیوں کا مصدقہ ڈیٹا فراہم کرنے پر تمام صوبائی حکومتوں کے تعاون کو سراہتے ہوئے ان کا خصوصی شکریہ ادا کیا۔