نیپال میں 64 سالہ چندریکا شریستھا کو ضلع نواکوٹ کے بیتراوتی علاقے میں ایک چار منزلہ مکان کے ملبے سے 10 دن بعد زندہ نکالا گیا۔
نیپال میں آنے والے تباہ کن سیلاب کے 10 روز (240 گھنٹے) بعد آرمڈ پولیس فورس نے نوواکوٹ ضلع کے علاقے بیٹراواٹی میں ایک تباہ شدہ گھر کے ملبے تلے دبی 64 سالہ خاتون چندیکا کماری شریستھا (Chandika Kumari Shrestha) کو معجزانہ طور پر زندہ نکال لیا۔
ریسکیو اہلکاروں نے ملبے کے اندر سے ان کی آواز سنی، جس کے بعد کارروائی کرکے انہیں باہر نکالا گیا،خاتون کو ہیلی کاپٹر کے ذریعے کھٹمنڈو منتقل کیا گیا، آرمڈ پولیس فورس کی 9 رکنی ٹیم نے کارروائی کرتے ہوئے انہیں بے ہوش مگر زندہ حالت میں باہر نکالا،اسی روز ایک چینی شہری کو بھی ہائیڈرو پاور منصو بے کی سرنگ سے تقریباً 10 دن بعد زندہ نکالا گیا ہے، یہ گزشتہ 2 روز کے دوران تریشولی پن بجلی منصوبے کے مقام پر تیسری کامیاب ریسکیو کارروائی ہے۔
اس سے قبل جمعے کو تریشولی 3 اے پن بجلی منصوبے کی ایک سرنگ سے 2 نیپالی کارکنوں کو زندہ باہر نکالا گیا تھا۔
نیپالی فوج کے مطابق چینی شہری کو نکالنے کی کارروائی میں نیپالی فوجی اہلکاروں کے ساتھ جنوبی کوریا کے ڈیزاسٹر رسپانس ماہرین نے بھی حصہ لیا،متاثرہ شخص کو 225 میٹر طویل سرنگ سے زندہ نکالا گیا، جس کے بعد اسے طبی معائنے کے لیے منتقل کر دیا گیا۔
فوج کی جانب سے جاری کی گئی تصاویر میں چینی شہری کو ہیلی کاپٹر کے ذریعے منتقل کرتے ہوئے دکھایا گیا ہے، جبکہ سفر کے دوران ایک فوجی طبی اہلکار بھی اس کے ساتھ موجود تھا۔
نیپالی حکام کے مطابق ملک کے 12 پن بجلی منصوبوں میں تقریباً 900 کارکن تاحال لاپتا ہیں، جن میں سے لگ بھگ 500 کے مختلف سرنگوں میں پھنسے ہونے کا خدشہ ہے۔
یہ تباہی گلیشیئر کے انہدام کے بعد آنے والے شدید سیلاب سے ہوئی، جس میں 1,300 سے زیادہ افراد ہلاک ہوئے ہئں ، جبکہ نیپال کی ڈیزاسٹر مینجمنٹ ایجنسی کے مطابق 5000 سے زائد افراد اب بھی لاپتا ہیں،امدادی اداروں کی جانب سے متاثرہ علاقوں میں ریسکیو آپریشن جاری ہے اور سرنگوں، تباہ شدہ عمارتوں اور دیگر مقامات پر پھنسے افراد کی تلاش کی جا رہی ہے۔