امریکی تحقیقاتی ادارے مڈل ایسٹ انسٹی ٹیوٹ کی تازہ رپورٹ میں افغان طالبان کے حکومتی ڈھانچے اور اہم رہنماؤں سے متعلق سنگین نوعیت کے انکشافات سامنے آئے ہیں۔
رپورٹ کے مطابق افغان طالبان کے 20 فیصد سے زائد رہنما ماضی میں بم دھماکوں اور خودکش حملوں کی منصوبہ بندی اور ان پر عملدرآمد میں مبینہ طور پر ملوث رہے ہیں، جنہیں "ماسٹر مائنڈز” قرار دیا گیا ہے۔دوسری جانب افغان میڈیا کی رپورٹس میں دعویٰ کیا گیا ہے کہ طالبان کی 33 رکنی کابینہ میں سے 13 سے 14 ارکان اقوام متحدہ کی پابندیوں کی فہرست میں شامل ہیں۔ ان میں افغان عبوری وزیر اعظم ملا محمد حسن اخوند، نائب وزیر اعظم، افغان عبوری وزیر داخلہ سراج الدین حقانی اور وزیر خارجہ امیر خان متقی سمیت متعدد اہم شخصیات کے نام شامل ہیں۔
رپورٹ میں مزید بتایا گیا ہے کہ مجموعی طور پر طالبان سے وابستہ 135 افراد اور 5 ادارے عالمی پابندیوں کی فہرست میں موجود ہیں۔ ان پابندیوں کے تحت ان افراد کے اثاثے منجمد ہیں جبکہ ان پر سفری پابندیاں اور اسلحہ کی خرید و فروخت پر بھی پابندیاں عائد ہیں۔