صدر مملکت آصف علی زرداری کا جلد چین کا اہم سرکاری دورہ متوقع ہے، جس کے دوران اعلیٰ سطحی ملاقاتیں اور دو طرفہ امور پر تفصیلی بات چیت ہوگی۔
ذرائع کے مطابق صدر آصف علی زرداری کا مجوزہ دورۂ چین تقریباً 5 سے 6 دن پر محیط ہوگا، جس میں وہ چین کی اعلیٰ قیادت اور اہم حکومتی شخصیات سے ملاقاتیں کریں گے۔ ان ملاقاتوں میں پاکستان اور چین کے درمیان تعلقات کو مزید مضبوط بنانے، اقتصادی تعاون کے فروغ اور باہمی دلچسپی کے مختلف امور پر تبادلہ خیال کیا جائے گا۔ذرائع کا کہنا ہے کہ صدر مملکت ممکنہ طور پر 24 یا 25 اپریل کو چین روانہ ہوں گے، تاہم ان کے دورے کے حتمی شیڈول کو وزارتِ خارجہ کی جانب سے حتمی شکل دی جا رہی ہے۔
دورے کے دوران علاقائی اور عالمی صورتحال بھی ایجنڈے کا اہم حصہ ہوگی، جہاں دونوں ممالک کی قیادت موجودہ جغرافیائی و سیاسی حالات، خطے میں امن و استحکام اور باہمی تعاون کے نئے امکانات پر گفتگو کرے گی۔یہ دورہ پاکستان اور چین کے دیرینہ اسٹریٹجک تعلقات کے تناظر میں انتہائی اہم قرار دیا جا رہا ہے، جس سے دونوں ممالک کے درمیان مختلف شعبوں میں تعاون کو مزید وسعت ملنے کی توقع ہے۔