سوات: سوات میں اغوا کے بعد مبینہ زیادتی کا نشانہ بننے والی لڑکی دورانِ علاج دم توڑ گئی، جس کے بعد علاقے میں شدید افسوس اور غم کی لہر دوڑ گئی۔
پولیس کے مطابق متاثرہ لڑکی کو مبینہ طور پر اغوا کرنے کے بعد نشہ آور چیز کھلا کر زیادتی کا نشانہ بنایا گیا تھا۔ واقعے کے بعد لڑکی کو تشویشناک حالت میں اسپتال منتقل کیا گیا، تاہم وہ جانبر نہ ہو سکی اور زخموں کی تاب نہ لاتے ہوئے انتقال کر گئی۔ڈسٹرکٹ پولیس آفیسر (ڈی پی او) کے مطابق واقعے کا مقدمہ درج کر لیا گیا ہے اور کارروائی کرتے ہوئے دو ملزمان کو گرفتار کر لیا گیا ہے۔ گرفتار ملزمان سے تفتیش جاری ہے جبکہ واقعے کے دیگر پہلوؤں کا بھی جائزہ لیا جا رہا ہے۔
پولیس کا کہنا ہے کہ متاثرہ خاندان کو انصاف کی فراہمی یقینی بنانے کے لیے تمام قانونی تقاضے پورے کیے جا رہے ہیں اور شواہد کی روشنی میں مزید کارروائی عمل میں لائی جائے گی۔ حکام کے مطابق ملزمان کے خلاف مضبوط چالان عدالت میں پیش کیا جائے گا تاکہ انہیں قانون کے مطابق سزا دلائی جا سکے۔