وزیراعلیٰ پنجاب مریم نواز شریف نے کہا کہ ہر انسان کا خواب ہوتا ہے کہ اس کا اپنا گھر ہو، کیونکہ اپنا گھر مکینوں کو تحفظ اور اطمینان کا احساس دلاتا ہے۔
پروگرام کی افتتاحی تقریب سے خطاب کرتے ہوئے وزیراعلیٰ پنجاب نے لاہور کے علاقے کاہنہ میں پیش آنے والے افسوسناک واقعے پر گہرے دکھ اور افسوس کا اظہار کیا، کہا کہ وہ جاں بحق ہونے والے بچوں کے والدین کے درد کو بخوبی سمجھتی ہیں اور اس المناک سانحے پر شدید غمزدہ ہیں امید ہے کہ اس پروگرام کے آغاز کے بعد پنجاب بھر میں کسی خاندان کے گھر کی چھت کمزور نہیں رہے گی کہ اس کی خوشیاں چھین سکے۔
مریم نواز شریف نے بتایا کہ حکومت پنجاب ’اپنی چھت، محفوظ چھت‘ پروگرام کے تحت شہریوں کو 5 لاکھ روپے تک بلاسود قرض فراہم کر رہی ہے،ان کے مطابق، یہ قرض 9 سال کی مدت کے لیے دیا جائے گا تاکہ کم آمدنی والے خاندان آسان شرائط پر اپنے گھر کا خواب پورا کر سکیں حکومت کا مقصد عام شہریوں کو رہائش کی بہتر سہولتیں فراہم کرنا اور انہیں باعزت زندگی گزارنے کے مواقع دینا ہے انہوں نے اس عزم کا اعادہ کیا کہ پنجاب حکومت عوامی فلاح و بہبود کے منصوبوں کو ترجیح دیتے ہوئے ایسے اقدامات جاری رکھے گی جو عام آدمی کی زندگی میں حقیقی بہتری لا سکیں۔