لاہور کے پوش علاقے ڈی ایچ اے میں خطرناک کار ریسنگ کے دوران حادثہ کر کے فرار ہونے والے دونوں ملزمان کو پولیس نے گرفتار کر لیا۔
ترجمان ڈی آئی جی آپریشنز کے مطابق ڈی آئی جی آپریشنز نے اے ایس پی ڈیفنس کو ملزمان کی فوری ٹریسنگ اور گرفتاری کا ٹاسک دیا تھا۔پولیس نے جدید ٹیکنالوجی کی مدد سے کارروائی کرتے ہوئے ملزمان مدثر مشتاق اور دانیال امتیاز کاظمی کو حراست میں لے لیا۔ واقعے میں استعمال ہونے والی بلیک ایم جی اور ہونڈا سوک گاڑیاں بھی تحویل میں لے لی گئی ہیں۔ترجمان کے مطابق سیف سٹی اور ڈی ایچ اے کے کیمروں کی مدد سے گاڑیوں کی شناخت کی گئی، جبکہ ایکسائز ریکارڈ اور موبائل ڈیٹا کے ذریعے ملزمان تک رسائی ممکن ہوئی۔
پولیس کا کہنا ہے کہ یہ واقعہ 19 اپریل کی صبح 4 بج کر 37 منٹ پر مین بلیوارڈ ڈی ایچ اے پر پیش آیا، جہاں تیز رفتار گاڑی نے موٹرسائیکل سوار 25 سالہ فیصل رحمان کو ٹکر مار دی، جس کے نتیجے میں وہ شدید زخمی ہو گئے۔ زخمی شہری کو فوری طور پر جنرل ہسپتال منتقل کیا گیا۔ابتدائی تحقیقات کے مطابق دونوں ملزمان آپس میں کلاس فیلوز ہیں اور کار ریسنگ میں ملوث تھے۔ ترجمان ڈی آئی جی آپریشنز نے واضح کیا ہے کہ شہریوں کی جان کو خطرے میں ڈالنے والوں کے خلاف بلا امتیاز کارروائیاں جاری رہیں گی۔