واشنگٹن: امریکا میں ایک اہم پیش رفت کے دوران ڈونلڈ ٹرمپ کی انتظامیہ نے امریکی وزیر بحریہ جان سی فیلن کو اچانک عہدے سے برطرف کر دیا ہے، تاہم اس فیصلے کی فوری وجوہات سامنے نہیں لائی گئیں۔
میڈیا رپورٹس کے مطابق صدر ٹرمپ نے نومبر 2024 میں جان سی فیلن کو وزیر نیوی نامزد کیا تھا، جس پر اس وقت بھی تنقید سامنے آئی تھی۔ ناقدین کا کہنا تھا کہ فیلن کے پاس بحریہ، فوج، قومی سلامتی پالیسی یا دفاعی صنعت سے متعلق خاطر خواہ تجربہ موجود نہیں تھا۔بعد ازاں فروری 2025 میں جان سی فیلن سینیٹ کمیٹی کے سامنے پیش ہوئے، جبکہ مارچ 2025 میں انہیں 30 کے مقابلے 62 ووٹوں سے اس عہدے کے لیے توثیق حاصل ہوئی۔ برطرفی کے بعد ہنگ کاؤ کو قائم مقام وزیر بحریہ مقرر کر دیا گیا ہے۔واضح رہے کہ امریکی وزیر نیوی بحریہ کے انتظامی، مالیاتی اور پالیسی معاملات کی نگرانی کرتا ہے اور یہ عہدہ دفاعی ڈھانچے میں اہم حیثیت رکھتا ہے۔
یاد رہے کہ اس سے قبل ایران جنگ کے دوران امریکی وزیر جنگ پیٹ ہیگسیتھ نے آرمی چیف آف اسٹاف جنرل رینڈ جارج کو فوری طور پر مستعفی ہونے پر مجبور کیا تھا، جس کے بعد امریکی دفاعی قیادت میں تبدیلیوں کا سلسلہ جاری ہے۔