چین کے شمالی صوبے میں واقع کوئلے کی کان میں گیس بھر جانے کے باعث ایک ہولناک دھماکہ ہوا ہے، جس کے نتیجے میں کم از کم 82 کان کن ہلاک اور متعدد لاپتا ہیں جبکہ ہلاکتوں میں اضافے کا خدشہ ہے۔
عالمی خبر رساں ادارے کے مطابق جس وقت یہ افسوسناک حادثہ پیش آیا، اس وقت کان کے اندر 247 کان کن کام میں مصروف تھے دھماکے کے فوری بعد انتظامیہ نے بڑے پیمانے پر ریسکیو اور سرچ آپریشن کا آغاز کر دیا تھاامدادی کارروائیوں کے دوران کان میں پھنسے ہوئے 100سے زائد افراد کو بحفاظت زندہ نکال لیا گیا ہے، جبکہ 188 کان کنوں کو شدید زخمی حالت میں فوری طور پر قریبی اسپتالوں میں منتقل کیا گیا ہے۔
مقامی پولیس کا کہنا ہے کہ کان کے اندر پھیلی زہریلی گیس کی وجہ سے زیادہ تر زخمیوں کی حالت انتہائی تشویشناک ہے، جس کی وجہ سے ہلاکتوں میں مزید اضافے کا شدید خدشہ ظاہر کیا جا رہا ہےابتدائی تحقیقاتی رپورٹ میں یہ بات سامنے آئی ہے کہ حادثے کی جگہ پر کاربن مونو آکسائیڈ گیس خطرناک حد تک جمع ہو گئی تھی، جسے اس ہولناک دھماکے کی بنیادی وجہ قرار دیا جا رہا ہے۔
واضح رہے کہ اس سے قبل سال 2009میں بھی شمال مشرقی صوبے ہیلونگ جیانگ کی ایک کان میں دھماکے سے 100ے زائد افراد ہلاک ہوئے تھے، جبکہ سال 2023 میں اندرونِ منگولیا کی ایک اوپن پٹ کان بیٹھنے سے 53 کان کن مارے گئے تھے۔