پنجاب بھر میں 13 سے 17 ستمبر تک دفعہ 144 نافذ کردی گئی ہے، جس کا محکمہ داخلہ پنجاب نے باقاعدہ نوٹیفکیشن جاری کردیا۔ نوٹیفکیشن کے مطابق عوامی مقامات، شاہراہوں اور کھلی جگہوں پر 5 یا اس سے زائد افراد کے اجتماع، جلوس اور اکٹھا ہونے پر پابندی عائد کردی گئی ہے، جبکہ عوامی مقامات پر ہر قسم کے ہتھیار لے جانے اور ان کی نمائش پر بھی مکمل پابندی ہوگی۔
محکمہ داخلہ پنجاب کے مطابق غیرقانونی اجتماعات میں شرکت کے لیے اکسانے یا ترغیب دینے پر بھی پابندی عائد کی گئی ہے۔ تاہم ان پابندیوں کا اطلاق شادی کی تقریبات، نماز جنازہ، تدفین، مساجد اور دیگر عبادت گاہوں پر نہیں ہوگا۔
نوٹیفکیشن کے مطابق عدالتیں، حکومتی ادارے اور باضابطہ اجازت سے منعقد ہونے والی تقریبات بھی پابندی سے مستثنیٰ ہوں گی، جبکہ ڈیوٹی پر تعینات قانون نافذ کرنے والے اداروں اور سیکیورٹی اہلکاروں پر بھی دفعہ 144 کی پابندیوں کا اطلاق نہیں ہوگا۔
محکمہ داخلہ پنجاب کا کہنا ہے کہ عوامی امن، سکون اور جان و مال کو لاحق سنگین خطرات کے پیش نظر صوبے بھر میں دفعہ 144 نافذ کی گئی ہے۔ قانون نافذ کرنے والے اداروں کی جانب سے فوری نوعیت کے خطرات سے متعلق اطلاعات موصول ہوئی ہیں، جبکہ انٹیلی جنس رپورٹس میں دہشت گرد تنظیموں کی جانب سے عوامی اجتماعات کو نشانہ بنانے کی منصوبہ بندی کا انکشاف ہوا ہے۔
محکمہ داخلہ کے مطابق اجتماعات، ریلیوں، جلسوں، دھرنوں، جلوسوں اور مظاہروں میں بڑی تعداد میں لوگوں کی موجودگی انہیں دہشت گردوں کے لیے آسان ہدف بنا سکتی ہے۔ قانون نافذ کرنے والے اداروں نے ممکنہ دہشت گردی سے نمٹنے کے لیے فوری اقدامات میں معاونت کی درخواست کی، جس کے بعد سیکرٹری داخلہ نے ضابطہ فوجداری 1898 کی دفعہ 144(6) کے تحت عوامی اجتماعات پر فوری پابندی عائد کردی۔