کاکروچ جنتا پارٹی، جسے سی جے پی کے نام سے بھی جانا جاتا ہے، نے ملک بھر میں جنتر منتر احتجاج کے دوسرے مرحلے کے آغاز کا اعلان کردیا ہے۔ پارٹی قیادت کے مطابق یہ مرحلہ حکومتوں اور سرکاری اداروں کی کارکردگی کے خلاف جاری احتجاجی سرگرمیوں کو مزید وسعت دینے کے لیے شروع کیا جائے گا۔
سی جے پی کے ترجمان سورو داس نے کہا کہ پارٹی کے بانی ابھیجیت ڈپکے کی جانب سے اعلان کردہ جنتر منتر سیزن 2 ملک کے مختلف علاقوں میں عوامی مسائل کے حوالے سے جاری تحریک کا اگلا مرحلہ ہے۔ ان کے مطابق مختلف علاقوں میں عوام نااہل حکومتوں اور سرکاری افسران کے خلاف اپنے مسائل کے لیے احتجاج کر رہے ہیں اور پارٹی ان آوازوں کو ایک پلیٹ فارم پر لانے کی کوشش کرے گی۔
پارٹی نے ملک گیر سطح پر لسننگ ٹور شروع کرنے کا بھی اعلان کیا ہے۔ اس مہم کے دوران پارٹی کے نمائندے مختلف علاقوں میں جا کر عوام سے براہ راست ملاقات کریں گے اور ان کے مسائل، شکایات اور تجاویز سنیں گے۔
سورو داس کے مطابق 15 اگست سے شروع ہونے والی نئی مہم میں تعلیم کے شعبے کو خصوصی اہمیت دی جائے گی۔ پارٹی نے والدین اور شہریوں سے اپیل کی ہے کہ وہ اپنے علاقوں کے سرکاری اسکولوں کا دورہ کریں اور وہاں موجود سہولتوں، تدریسی ماحول اور دیگر مسائل کا جائزہ لیں۔
انہوں نے شہریوں پر زور دیا کہ وہ سرکاری اسکولوں کی صورتحال کو ریکارڈ کریں اور ایک طرح کے سماجی آڈٹ کے ذریعے تعلیمی اداروں کی اصل حالت سامنے لائیں۔ پارٹی کا کہنا ہے کہ اس مہم کا مقصد صرف مسائل کی نشاندہی نہیں بلکہ ان کے حل کے لیے عوامی سطح پر کردار ادا کرنا بھی ہے۔
ترجمان نے کہا کہ نوجوانوں کو ملکی معاملات میں زیادہ فعال کردار ادا کرنا ہوگا تاکہ حقیقی ترقی اور بہتر حکمرانی کی بنیاد رکھی جا سکے۔ ان کا کہنا تھا کہ نوجوان نسل اب ذمہ داری سنبھال رہی ہے اور مستقبل میں ایک ترقی یافتہ بھارت کی تشکیل میں اہم کردار ادا کرے گی۔
واضح رہے کہ سی جے پی کے بانی ابھیجیت ڈپکے اس سے قبل بھی جنتر منتر احتجاج کے دوسرے مرحلے کے جلد آغاز کا اعلان کر چکے ہیں۔ پارٹی کا پہلا احتجاجی مرحلہ 37 روز تک جاری رہا، جس کا اختتام 25 جولائی کو ہوا تھا۔
کاکروچ جنتا پارٹی کا جنتر منتر احتجاج کا دوسرا مرحلہ شروع کرنے کا اعلان
