اسلام آباد: وفاقی پبلک سروس کمیشن (ایف پی ایس سی) نے سی ایس ایس 2026 کے تحریری امتحان کا نتیجہ جاری کردیا، جس کے مطابق امتحان میں کامیابی کی شرح صرف 2.74 فیصد رہی۔
ایف پی ایس سی کے مطابق سی ایس ایس 2026 کے تحریری امتحان میں مجموعی طور پر 17 ہزار 351 امیدواروں نے شرکت کی، تاہم سخت مقابلے کے باعث صرف 476 امیدوار تحریری امتحان میں کامیاب قرار پائے۔
کامیاب امیدواروں میں 239 مرد اور 237 خواتین شامل ہیں۔ اعداد و شمار کے مطابق کامیاب امیدواروں کی تعداد میں مردوں اور خواتین کے درمیان معمولی فرق ہے، جبکہ مجموعی طور پر امتحان دینے والے امیدواروں کی بڑی تعداد اگلے مرحلے تک رسائی حاصل نہیں کرسکی۔
سی ایس ایس کا امتحان ملک کے اہم ترین مسابقتی امتحانات میں شمار ہوتا ہے، جس کے ذریعے مختلف سرکاری محکموں اور انتظامی سروسز میں افسران کا انتخاب کیا جاتا ہے۔ تحریری امتحان میں کامیابی کے بعد امیدواروں کو مزید مراحل سے گزرنا ہوتا ہے۔
ایف پی ایس سی کے مطابق تحریری امتحان میں کامیاب قرار پانے والے امیدواروں کے میڈیکل، نفسیاتی ٹیسٹ اور زبانی امتحان کا شیڈول جلد جاری کیا جائے گا۔
اگلے مراحل میں کامیاب امیدواروں کی مجموعی کارکردگی، میڈیکل فٹنس، نفسیاتی جائزے اور زبانی امتحان کی بنیاد پر حتمی انتخاب کا عمل مکمل کیا جائے گا۔