ڈیرہ غازی خان کے علاقے دراہمہ میں ایک گونگی بہری 25 سے 26 سالہ لڑکی سے مبینہ زیادتی کا افسوسناک واقعہ سامنے آیا ہے، جس کے نتیجے میں متاثرہ لڑکی کے حاملہ ہونے کا انکشاف ہوا ہے۔ پولیس نے متاثرہ کی والدہ کی مدعیت میں مقدمہ درج کرکے تفتیش شروع کردی۔
ایف آئی آر کے مطابق چاہ ڈھورے والا کی رہائشی نذیر مائی نے پولیس کو بتایا کہ یکم ستمبر کو صبح تقریباً 8 بجے اس کی گونگی بہری بیٹی شیلا بی بی کے پیٹ میں تکلیف ہوئی، جس پر وہ اسے چیک اپ کے لیے آر ایچ سی سرور والی لے جانے کی تیاری کر رہی تھی۔پولیس کے مطابق متاثرہ لڑکی نے اشاروں کی زبان میں والدہ کو بتایا کہ تقریباً 6 ماہ قبل وہ اپنی نانی کے گھر اکیلی جارہی تھی کہ راستے میں سعید احمد جڑھ کی کماد کی فصل میں مبینہ طور پر چھپے محمد خلیل نے اسے اکیلا پاکر زبردستی فصل میں لے جاکر مبینہ زیادتی کی۔ایف آئی آر کے متن کے مطابق متاثرہ لڑکی نے اشاروں میں بتایا کہ مبینہ زیادتی کے نتیجے میں وہ حاملہ ہوگئی۔ والدہ نے پولیس کو بتایا کہ ملزم واقعے کے بعد لاہور میں رہائش پذیر ہے۔
پولیس کا کہنا ہے کہ اطلاع ملنے پر متعلقہ افسر موقع پر پہنچا، جہاں متاثرہ لڑکی اور اس کی والدہ کا بیان ریکارڈ کیا گیا۔ متاثرہ لڑکی کو طبی معائنے اور میڈیکل لیگل سرٹیفکیٹ کے حصول کے لیے آر ایچ سی سرور والی روانہ کیا گیا۔پولیس نے ابتدائی بیان اور حالات و واقعات کی بنیاد پر مقدمہ درج کرکے تفتیش شروع کردی ہے۔ واقعے کے تمام پہلوؤں کا جائزہ لیا جا رہا ہے جبکہ ملزم کی گرفتاری کے لیے بھی کارروائی جاری ہے۔