حکومت نے پیٹرولیم مصنوعات کی قیمتوں میں اضافے کا باضابطہ نوٹیفکیشن جاری کر دیا ہے، جس کے تحت پیٹرول کی قیمت میں 5 روپے 44 پیسے فی لیٹر جبکہ ہائی اسپیڈ ڈیزل کی قیمت میں 31 روپے 5 پیسے فی لیٹر اضافہ کر دیا گیا ہے۔
پیٹرولیم ڈویژن کی جانب سے جاری اعلامیے کے مطابق حالیہ اضافے کے بعد پیٹرول کی نئی قیمت 316 روپے 15 پیسے فی لیٹر مقرر کی گئی ہے، جبکہ ہائی اسپیڈ ڈیزل 354 روپے 35 پیسے فی لیٹر میں دستیاب ہوگا۔
نوٹیفکیشن کے مطابق نئی قیمتوں کا اطلاق آج رات 12 بجے سے ہوگا۔ حکومت نے واضح کیا ہے کہ یہ قیمتیں 18 جولائی سے 20 جولائیتک نافذ العمل رہیں گی۔
پیٹرولیم مصنوعات کی قیمتوں میں اضافے کے بعد ٹرانسپورٹ، اشیائے خورونوش کی ترسیل اور دیگر شعبوں پر اس کے اثرات مرتب ہونے کا امکان ہے۔ ماہرین کا کہنا ہے کہ ڈیزل کی قیمت میں نمایاں اضافہ مال برداری اور زرعی شعبے کے اخراجات میں اضافے کا باعث بن سکتا ہے، جس کے نتیجے میں مہنگائی پر بھی دباؤ بڑھنے کا خدشہ ہے۔
دوسری جانب عوام اور کاروباری حلقوں کی جانب سے قیمتوں میں اضافے پر تشویش کا اظہار کیا جا رہا ہے، جبکہ حکومت کا مؤقف ہے کہ پیٹرولیم مصنوعات کی قیمتوں کا تعین عالمی منڈی میں خام تیل کی قیمتوں، درآمدی لاگت اور دیگر مالی عوامل کو مدنظر رکھتے ہوئے کیا جاتا ہے۔
یہ اعلان ایسے وقت میں سامنے آیا ہے جب حکومت پیٹرولیم مصنوعات کی قیمتوں کے تعین کے نظام میں اصلاحات اور مستقبل میں قیمتوں کے زیادہ شفاف طریقہ کار پر بھی غور کر رہی ہے۔
پیٹرول اور ڈیزل کی قیمتوں میں بڑا اضافہ، نئی قیمتوں کا نوٹیفکیشن جاری
