اوکاڑہ (نامہ نگار ملک ظفر)جشن عید میلاد النبیؐ کے موقع پر روایتی جلوس کا شاندار اور باوقار انعقاد، ڈپٹی کمشنر محمد اکرام ملک نے مرکزی میلاد جلوس میں خصوصی شرکت کی۔ اس موقع پر ڈی پی او ڈاکٹر اسد اعجاز ملہی، ایڈیشنل ڈپٹی کمشنر میونسپل سروسز احمد سلیم چشتی سمیت دیگر افسران بھی ہمراہ تھے۔ میلاد کمیٹی کے نمائندوں کی جانب سے ڈپٹی کمشنر کا پرتپاک استقبال کیا گیا۔ ڈپٹی کمشنر کا جلوس کے روٹ پر سیکیورٹی، ہیلتھ ڈیسکس اور ریسکیو انتظامات کا جائزہ لیا اور جلوس کے روٹ پر قائم پانی کی سبیلوں اور دیگر بلدیاتی سہولیات کا معائنہ کیا۔ ڈپٹی کمشنر نے جلوسوں کے بااحسن اختتام تک تمام محکموں کو الرٹ رہنے اور اقدامات جاری رکھنے کی ہدایات دیں۔ انہوں نے خطاب کرتے ہوئے کہا کہ حضور پاک کا یوم ولادت ہمارے لیے باعثِ برکت اور بے پناہ خوشی کا دن ہے۔ سیرتِ طیبہ کا بنیادی درس محبت، برداشت، امن اور ایک دوسرے کا احساس کرنا ہے۔ ڈپٹی کمشنر محمد اکرام ملک نے کہا کہ میلاد کمیٹی کے نمائندگان اور جید علماء کرام کا تعاون انتہائی قابلِ تحسین ہے۔ انہوں نے مزید کہا کہ ضلع کی تینوں تحصیلوں میں عید میلاد النبی کے جلوسوں کا انعقاد کیا جا رہا ہے جس میں عاشقان رسول کی بڑی تعداد نے شرکت کی ہے۔ محمد اکرام ملک نے کہا کہ نبی کریمؐ کی آمد کا دن باہمی اتحاد اور امن و سلامتی کا پیغام دیتا ہے۔ عہد کریں کہ معاشرے میں امن اور باہمی بھائی چارے کو مزید فروغ دیں گے۔
اوکاڑہ(نامہ نگار ملک ظفر)پنجاب آرٹس کونسل کے زیر اہتمام جشن عید میلاد النبی ﷺ کی مناسبت سے مقابلہ مقالہ نگاری اور مقابلہ قرأت و نعت کا انعقاد اوکاڑہ آرٹس کونسل میں کیا گیا، جس میں ضلع اوکاڑہ کے مختلف سکولوں، مدارس، کالجوں اور یونیورسٹیوں کے طلبہ و طالبات نے بڑی تعداد میں شرکت کی۔ مقابلہ مقالہ نگاری میں سیرت النبی ﷺ کے امن، ہمدردی، باہمی ہم آہنگی، رواداری اور انسانیت سے محبت کے پیغام کو اجاگر کرنے کے حوالے سے طلبہ نے اپنے تحقیقی و ادبی جوہر دکھائے، جبکہ مقابلہ قرأت و نعت میں شرکاء نے اپنی خوبصورت آواز اور فنِ قرأت و نعت سے حاضرین کو محظوظ کیا۔ مقابلہ جات میں اوکاڑہ کے نامور قراء، نعت خواں حضرات اور سیرت النبی ﷺ پر تحقیقی و علمی مہارت رکھنے والے مختلف تعلیمی اداروں کے اساتذہ نے بطور منصف خدمات سرانجام دیں۔ مقابلہ جات کے اختتام پر نمایاں کارکردگی کا مظاہرہ کرنے والے پوزیشن ہولڈرز کا اعلان کیا گیا، جس کے بعد تقریب تقسیم انعامات منعقد ہوئی۔ تقریب میں ڈپٹی کمشنر اکرام ملک نے بطور مہمان خصوصی شرکت کی اور پوزیشن ہولڈرز میں انعامی چیکس اور اسناد تقسیم کیں۔ انہوں نے مقابلہ جات میں حصہ لینے والے تمام طلبہ کی حوصلہ افزائی کرتے ہوئے ان کی کاوشوں کو سراہا۔ اس موقع پر ڈپٹی کمشنر اکرام ملک نے کہا کہ حکومت پنجاب کے زیر اہتمام اس نوعیت کی مثبت اور بامقصد سرگرمیوں کے انعقاد کا مقصد نوجوانوں کو اپنی صلاحیتیں نکھارنے کے لیے مؤثر مواقع اور پلیٹ فارم فراہم کرنا، نئی نسل کو اسلامی اقدار سے روشناس کروانا اور سیرت النبی صلیﷺ کے امن، ہمدردی، باہمی ہم آہنگی، رواداری اور انسانیت سے محبت کے پیغام کو اجاگر کرنا ہے۔ انہوں نے کہا کہ نوجوان نسل کو صحت مند، تعمیری اور مثبت سرگرمیوں کی جانب راغب کرنا وقت کی اہم ضرورت ہے۔