وزیراعظم محمد شہباز شریف کی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) نے بلوچستان میں پیش آنے والے المناک کوئلہ کان حادثے میں جاں بحق کان کنوں کے لواحقین میں مالی امداد تقسیم کردی۔
جولائی 2026 میں پیش آنے والے حادثے میں جاں بحق ہونے والے 34 کان کنوں کے خاندانوں کو فی خاندان 20 لاکھ روپے کے امدادی چیکس دیے گئے۔
این ڈی ایم اے کی ٹیم نے خیبر پختونخوا کے ضلع شانگلہ میں مقامی نمائندہ ڈاکٹر عباد اللہ کی معاونت سے متاثرہ خاندانوں میں امدادی چیکس تقسیم کیے۔
اس موقع پر وفاقی حکومت کی جانب سے جاں بحق کان کنوں کے اہل خانہ سے اظہار یکجہتی کیا گیا اور انہیں یقین دہانی کرائی گئی کہ مشکل کی اس گھڑی میں متاثرہ خاندانوں کو ہر ممکن معاونت فراہم کی جائے گی۔
حکومت کی جانب سے اس عزم کا بھی اعادہ کیا گیا کہ حادثات سے متاثرہ خاندانوں کی مشکلات کم کرنے اور انہیں بروقت امداد کی فراہمی کے لیے اقدامات جاری رکھے جائیں گے۔