ریاض: سعودی عرب کے دارالحکومت ریاض کے علاقے منفوحہ میں گیس سلنڈر دھماکے کے نتیجے میں پانچ پاکستانی شہری جاں بحق ہو گئے۔ افسوسناک واقعے کے بعد پاکستانی کمیونٹی میں غم کی لہر دوڑ گئی جبکہ متاثرہ خاندانوں میں کہرام مچ گیا۔
ابتدائی اطلاعات کے مطابق جاں بحق ہونے والے تمام افراد کا تعلق خیبر پختونخوا کے ضلع مانسہرہ سے تھا۔ جاں بحق افراد کی شناخت محمد سعید، عابد حسین، عبدالرحمان، محمد سفیر اور محمد رستم کے ناموں سے ہوئی ہے۔
ذرائع کے مطابق دھماکا ایک رہائشی مقام پر گیس سلنڈر پھٹنے سے ہوا، جس کے نتیجے میں شدید آگ بھڑک اٹھی۔ امدادی ٹیمیں فوری طور پر جائے وقوعہ پر پہنچیں اور آگ پر قابو پانے کے بعد لاشوں کو قریبی اسپتال منتقل کیا گیا۔
واقعے کے بعد سعودی حکام نے علاقے کو گھیرے میں لے کر تحقیقات کا آغاز کر دیا ہے تاکہ دھماکے کی اصل وجہ معلوم کی جا سکے۔ ابتدائی طور پر شبہ ظاہر کیا جا رہا ہے کہ حادثہ گیس کے اخراج یا سلنڈر میں فنی خرابی کے باعث پیش آیا، تاہم حتمی رپورٹ آنے کے بعد ہی اصل حقائق سامنے آئیں گے۔
دوسری جانب پاکستانی سفارتی حکام بھی سعودی حکام سے مسلسل رابطے میں ہیں اور جاں بحق افراد کی شناخت، قانونی کارروائی اور میتوں کی وطن واپسی کے لیے ضروری اقدامات کیے جا رہے ہیں۔ متاثرہ خاندانوں کو ہر ممکن سفارتی معاونت فراہم کرنے کی یقین دہانی بھی کرائی گئی ہے۔
مقامی پاکستانی برادری نے واقعے پر گہرے دکھ اور افسوس کا اظہار کرتے ہوئے مرحومین کے درجات کی بلندی اور اہل خانہ کے لیے صبر جمیل کی دعا کی ہے۔ اہل علاقہ اور عزیز و اقارب بھی اپنے پیاروں کی میتوں کی وطن واپسی کے منتظر ہیں۔