اسلام آباد: وزیراعظم محمد شہباز شریف سے بلوچستان کے سابق وزیراعلیٰ اور رکن بلوچستان اسمبلی ڈاکٹر عبدالمالک بلوچ کی قیادت میں ایک وفد نے ملاقات کی، جس میں صوبے کی مجموعی امن و امان کی صورتحال اور باہمی دلچسپی کے مختلف امور پر تفصیلی تبادلہ خیال کیا گیا۔
وزیراعظم ہاؤس میں ہونے والی ملاقات کے دوران بلوچستان میں امن، استحکام اور ترقی سے متعلق مختلف پہلوؤں کا جائزہ لیا گیا۔ اس موقع پر وفاق اور بلوچستان کے درمیان تعاون کو مزید مؤثر بنانے اور عوامی مسائل کے حل کے لیے مشترکہ کوششوں پر بھی گفتگو ہوئی۔
ملاقات میں نائب وزیراعظم و وزیر خارجہ سینیٹر محمد اسحاق ڈار، وزیراعظم کے مشیر برائے سیاسی امور رانا ثناء اللہ، سینیٹر جان محمد بلوچ، رکن قومی اسمبلی پولین بلوچ، رکن قومی اسمبلی جمال شاہ کاکڑ اور نیشنل پارٹی پنجاب کے صدر ایوب ملک بھی موجود تھے۔
شرکا نے بلوچستان کی موجودہ صورتحال، امن و امان کے قیام، سیاسی ہم آہنگی اور عوامی فلاح و بہبود سے متعلق مختلف تجاویز پر بھی تبادلہ خیال کیا۔ ملاقات میں اس امر پر زور دیا گیا کہ بلوچستان میں پائیدار امن اور ترقی کے لیے تمام متعلقہ فریقوں کے درمیان مشاورت اور تعاون کو مزید فروغ دیا جائے۔
وزیراعظم شہباز شریف نے بلوچستان کی ترقی اور عوامی مسائل کے حل کے لیے وفاقی حکومت کے عزم کا اعادہ کرتے ہوئے کہا کہ حکومت صوبے میں امن، خوشحالی اور ترقیاتی منصوبوں کی تکمیل کے لیے ہر ممکن اقدامات جاری رکھے گی۔ وفد نے بھی بلوچستان کے عوام کے مفاد میں تعاون اور مثبت سیاسی رابطوں کو جاری رکھنے کی ضرورت پر زور دیا۔
وزیراعظم شہباز شریف سے عبدالمالک بلوچ کی ملاقات، بلوچستان کی امن و امان کی صورتحال پر تبادلہ خیال
