پاکستان میں مہنگائی کا طوفان تھمنے کا نام نہیں لے رہا، روزمرہ استعمال کی اشیاء کی قیمتوں میں مسلسل اضافہ عوام کے لیے شدید مشکلات کا باعث بن رہا ہے۔ حالیہ دنوں میں گھی اور کوکنگ آئل کی قیمتوں میں ایک بار پھر اضافہ ریکارڈ کیا گیا ہے، جس کے بعد یہ ملکی تاریخ کی بلند ترین سطح پر پہنچ گئی ہیں۔
تفصیلات کے مطابق پیداواری لاگت، درآمدی اخراجات اور مارکیٹ میں بڑھتی ہوئی مہنگائی کے باعث گھی اور کوکنگ آئل مزید مہنگے ہو گئے ہیں۔ نئی قیمتوں کے مطابق گھی کی فی کلو قیمت میں 3 روپے اضافہ کیا گیا ہے جس کے بعد یہ 598 روپے فی کلو تک پہنچ گئی ہے، جبکہ کوکنگ آئل 618 روپے فی کلو میں فروخت ہو رہا ہے۔
مارکیٹ ذرائع کے مطابق اشیائے خوردونوش کی قیمتوں میں مسلسل اضافے نے متوسط اور کم آمدنی والے طبقے کی مشکلات میں کئی گنا اضافہ کر دیا ہے۔ شہریوں کا کہنا ہے کہ روزمرہ ضروریات پوری کرنا اب انتہائی مشکل ہو چکا ہے اور گھریلو بجٹ بری طرح متاثر ہو رہا ہے۔
دوسری جانب آٹے کی قیمتوں میں بھی اضافہ ریکارڈ کیا گیا ہے۔ گزشتہ ہفتے 10 کلو آٹے کے تھیلے کی قیمت میں 10 سے 20 روپے تک اضافہ دیکھنے میں آیا، جس کے بعد مختلف علاقوں میں آٹا مہنگے داموں فروخت کیا جا رہا ہے۔ اسی طرح اچھی کوالٹی کے چاول بھی عام آدمی کی پہنچ سے دور ہوتے جا رہے ہیں۔
ماہرین معاشیات کے مطابق خوراک کی بڑھتی قیمتیں مہنگائی کی مجموعی شرح میں مزید اضافہ کر سکتی ہیں، جبکہ تنخواہ دار طبقہ سب سے زیادہ متاثر ہو رہا ہے۔ شہریوں نے حکومت سے مطالبہ کیا ہے کہ فوری اقدامات کیے جائیں تاکہ بنیادی اشیائے ضروریہ کی قیمتوں کو کنٹرول کیا جا سکے اور عوام کو ریلیف فراہم ہو۔
عوامی حلقوں کا کہنا ہے کہ اگر مہنگائی کا یہی سلسلہ جاری رہا تو عام شہری کے لیے دو وقت کی روٹی کا انتظام بھی مشکل ہو جائے گا۔ لوگوں نے حکومت سے سبسڈی اور قیمتوں کی نگرانی کا مؤثر نظام متعارف کرانے کا مطالبہ کیا ہے۔
گھی اور کوکنگ آئل کی قیمتیں تاریخ کی بلند ترین سطح پر پہنچ گئیں
