اسلام آباد: حکومت پاکستان نے بیرونِ ملک روزگار کے خواہشمند شہریوں کے لیے اہم ہنگامی انتباہ جاری کرتے ہوئے نوکری اور ورک ویزا کے نام پر ہونے والے فراڈ سے محتاط رہنے کی ہدایت کی ہے۔
بیورو آف امیگریشن اینڈ اوورسیز ایمپلائمنٹ کی جانب سے جاری کردہ آگاہی میں کہا گیا ہے کہ بعض افراد اور غیر قانونی گروہ جعلی ملازمتوں اور فرضی ورک ویزا کی پیشکش کر کے شہریوں سے لاکھوں روپے ہتھیا رہے ہیں۔ حکام نے واضح کیا کہ صرف زبانی یقین دہانی یا غیر مصدقہ وعدوں پر کسی بھی شخص یا ایجنٹ کو رقم ادا نہ کی جائے۔
بیورو کے مطابق عام ٹریول ایجنسیاں صرف فضائی ٹکٹ، ہوٹل بکنگ اور سفری انتظامات تک محدود ہوتی ہیں۔ انہیں بیرونِ ملک ملازمت فراہم کرنے یا ورک ویزا جاری کرنے کا قانونی اختیار حاصل نہیں۔ اس لیے ایسے دعووں پر بھروسا کرنے سے پہلے مکمل تصدیق کرنا ضروری ہے۔
حکام نے شہریوں کو مشورہ دیا ہے کہ بیرونِ ملک ملازمت کے تمام مواقع صرف بیورو آف امیگریشن اینڈ اوورسیز ایمپلائمنٹ کے فارن جابز پورٹل یا حکومت سے باقاعدہ لائسنس یافتہ ریکروٹنگ ایجنسیوں کے ذریعے ہی تلاش کریں۔ سرکاری ذرائع سے معلومات حاصل کرنے سے جعلی بھرتیوں، مالی نقصان اور انسانی اسمگلنگ جیسے خطرات سے بچا جا سکتا ہے۔
بیورو نے مزید کہا کہ اگر کوئی فرد یا ادارہ نوکری یا ورک ویزا کے نام پر غیر قانونی طور پر رقم طلب کرے یا مشکوک پیشکش کرے تو اس کی فوری اطلاع وفاقی تحقیقاتی ادارے (ایف آئی اے) کو دی جائے تاکہ ذمہ دار عناصر کے خلاف قانونی کارروائی کی جا سکے۔
حکام نے اس بات پر بھی زور دیا کہ بیرونِ ملک ملازمت حاصل کرنے کے خواہشمند افراد اپنی محنت کی کمائی کسی غیر رجسٹرڈ ایجنٹ یا درمیانی شخص کے حوالے نہ کریں۔ قانونی طریقہ کار اپنانا نہ صرف محفوظ ہے بلکہ اس سے ملازمت کے بہتر اور مستند مواقع بھی حاصل کیے جا سکتے ہیں۔
بیورو آف امیگریشن نے شہریوں سے اپیل کی ہے کہ وہ بیرونِ ملک روزگار کے سلسلے میں ہر مرحلے پر احتیاط سے کام لیں، تمام دستاویزات اور ملازمت کی پیشکش کی تصدیق کریں اور صرف سرکاری و قانونی ذرائع پر اعتماد کریں تاکہ کسی بھی قسم کے فراڈ یا دھوکے سے محفوظ رہا جا سکے۔
بیرون ملک ملازمت کے نام پر فراڈ سے ہوشیار رہیں، حکومت کا ہنگامی انتباہ
