لاہور: گورنمنٹ گریجویٹ کالج برائے خواتین اسلام پورہ میں پرنسپل ڈاکٹر عابدہ بخاری کی قیادت میں ایک پروقار تقریب کا انعقاد کیا گیا، جس میں ڈے کیئر سنٹر اور اسٹوڈنٹس/کیرئیر کونسلنگ سنٹر کا افتتاح، سالانہ تقسیمِ انعامات اور مختلف شعبہ جات کی نمائشوں کا اہتمام کیا گیا۔
گورنمنٹ گریجویٹ کالج برائے خواتین اسلام پورہ میں منعقدہ تقریب میں سیاسی، تعلیمی اور سماجی شخصیات سمیت اساتذہ، طالبات اور والدین کی بڑی تعداد نے شرکت کی۔تقریب کے مہمانانِ خصوصی میں صوبائی وزیر بلال یاسین، مرغوب احمد، فزہ میمونہ، مس مہوش اظہر چوہدری، سید محسن رضا بخاری، نعیم اقبال، ڈاکٹر کاشف فراز، ڈاکٹر نصرت جبین اور ڈاکٹر فاروق حیدر سمیت دیگر اہم شخصیات شامل تھیں۔
کیرئیر کونسلنگ سنٹر کا افتتاح ڈپٹی ڈائریکٹر ڈائریکٹوریٹ آف کالجز نعیم اقبال نے کیا۔ اس موقع پر بتایا گیا کہ سنٹر کا مقصد طالبات کو تعلیمی رہنمائی، کیرئیر کونسلنگ اور ذہنی و جذباتی معاونت فراہم کرنا ہے تاکہ انہیں بہتر تعلیمی اور پیشہ ورانہ مواقع میسر آسکیں۔ڈے کیئر سنٹر کا افتتاح صوبائی وزیر بلال یاسین، اراکینِ اسمبلی اور دیگر معزز مہمانانِ گرامی نے مشترکہ طور پر کیا۔ مقررین نے اسے طالبات اور کالج اسٹاف کے لیے ایک اہم اور مفید اقدام قرار دیتے ہوئے کہا کہ اس سے خواتین کی تعلیمی سرگرمیوں میں مزید آسانی پیدا ہوگی۔
افتتاحی تقاریب کے بعد مہمانانِ گرامی نے سائنس، فائن آرٹس، ہوم اکنامکس اور سائیکالوجی ڈیپارٹمنٹ کی جانب سے لگائے گئے اسٹالز اور نمائشوں کا دورہ کیا۔ سائنس ایگزیبیشن میں بائیولوجی، فزکس، کیمسٹری، کمپیوٹر سائنس اور سائیکالوجی سے متعلق جدید پراجیکٹس پیش کیے گئے جبکہ کمپیوٹر سائنس ڈیپارٹمنٹ کی جانب سے اے آئی بیسڈ اپیلیکیشن اور ٹیکنالوجی پراجیکٹس کو خصوصی پذیرائی حاصل ہوئی۔ہوم اکنامکس ڈیپارٹمنٹ نے quilting، handicrafts اور گھریلو مہارتوں پر مبنی تخلیقی کام پیش کیے جبکہ فائن آرٹس ڈیپارٹمنٹ نے خوبصورت paintings، artistic structures اور creative displays کے ذریعے حاضرین کو متاثر کیا۔ مہمانانِ گرامی نے طالبات کی تخلیقی صلاحیتوں، اعتماد اور محنت کو سراہا۔
بعد ازاں کالج آڈیٹوریم میں سالانہ تقسیمِ انعامات کی تقریب منعقد ہوئی، جس کا آغاز تلاوتِ کلامِ پاک اور نعتِ رسولِ مقبول ﷺ سے کیا گیا۔ کالج کی میوزک سوسائٹی کی طالبات نے کلامِ اقبال پیش کیا ،تقریب سے خطاب کرتے ہوئے مقررین نے کالج کی تعلیمی ترقی، نظم و ضبط اور تخلیقی سرگرمیوں کو سراہتے ہوئے وزیراعلیٰ پنجاب مریم نواز شریف کے تعلیمی وژن کو خراجِ تحسین پیش کیا۔ انہوں نے کہا کہ حکومتِ پنجاب خواتین کو بااختیار بنانے اور جدید تعلیمی سہولیات کی فراہمی کے لیے مؤثر اقدامات کر رہی ہے۔
اس موقع پر انٹرمیڈیٹ اور بی ایس امتحانات 2025 میں نمایاں کارکردگی دکھانے والی طالبات میں شیلڈز، میڈلز، سرٹیفکیٹس اور ایوارڈز تقسیم کیے گئے۔ مختلف شعبہ جات کے ہائی اچیورز، بہترین پروکٹرز اور گرل گائیڈز کو بھی اعزازات سے نوازا گیا جبکہ تدریسی اور غیر تدریسی عملے کی خدمات کے اعتراف میں خصوصی شیلڈز اور نقد انعامات دیے گئے۔
تقریب کے اختتام پر مہمانانِ گرامی نے پرنسپل ڈاکٹر عابدہ بخاری، اساتذہ اور طالبات کو کامیاب اور منظم تقریب کے انعقاد پر مبارکباد دیتے ہوئے کہا کہ کالج تعلیمی معیار، جدت، نظم و ضبط اور خواتین کو بااختیار بنانے کی بہترین مثال بن چکا ہے۔
