خیبرپختونخوا کے ضلع ہنگو میں دہشت گردوں نے پولیس کی خزینہ بانڈہ چیک پوسٹ پر بڑا حملہ کر دیا، جس کے نتیجے میں ڈی ایس پی سٹی دیار خان سمیت 10 پولیس اہلکار شہید جبکہ 22 اہلکار زخمی ہوگئے۔
ضلعی پولیس آفیسر (ڈی پی او) طارق حبیب کے مطابق دہشت گردوں نے خزینہ بانڈہ چیک پوسٹ کو نشانہ بنایا، جہاں شدید فائرنگ کے تبادلے میں ڈی ایس پی سٹی دیار خان سمیت 10 اہلکاروں نے جامِ شہادت نوش کیا۔ڈی پی او کے مطابق زخمیوں میں ڈی ایس پی مجاہد حسین بھی شامل ہیں۔ تمام زخمی اہلکاروں کو فوری طور پر قریبی اسپتال منتقل کر دیا گیا، جہاں انہیں طبی امداد فراہم کی جا رہی ہے۔انہوں نے کہا کہ حملے کے بعد سیکیورٹی فورسز نے علاقے کو گھیرے میں لے کر دہشت گردوں کے خلاف سرچ اور کلیئرنس آپریشن شروع کر دیا ہے، جو آخری دہشت گرد کے خاتمے تک جاری رہے گا۔
دوسری جانب انسپکٹر جنرل (آئی جی) خیبرپختونخوا ذوالفقار حمید نے بتایا کہ پولیس کی بھرپور جوابی کارروائی میں 12 سے 15 دہشت گرد ہلاک ہوئے، جبکہ علاقے میں مزید کارروائیاں جاری ہیں۔واقعے کے بعد سیکیورٹی اداروں کو ہائی الرٹ کر دیا گیا ہے اور حملے کی مزید تحقیقات بھی شروع کر دی گئی ہیں۔