اسلام آباد: وفاقی وزیر برائے بحری امور محمد جنید انوار چوہدری سے پاکستان نیوی کے اعلیٰ سطحی وفد نے ملاقات کی، جس میں پاکستان کے میری ٹائم سیکٹر کی ترقی، قومی خوشحالی اور پاکستان انٹرنیشنل میری ٹائم ایکسپو اینڈ کانفرنس (PIMEC) کے فروغ سے متعلق امور پر تفصیلی تبادلہ خیال کیا گیا۔
ملاقات کے دوران پاک بحریہ کے وفد نے ملکی بحری شعبے کی استعداد کار بڑھانے اور اس کے معاشی و تجارتی امکانات سے بھرپور استفادے کے حوالے سے مختلف تجاویز وفاقی وزیر کے سامنے پیش کیں۔وفد میں کموڈور اشفاق اختر SI(M)، ڈپٹی چیف آف نیول اسٹاف (PMSTP)، کموڈور وسیم منور TI(M)، اسسٹنٹ چیف آف نیول اسٹاف (PMSTP)، اور کیپٹن احمد شبیہ الکبیر PN TI(M)، ڈائریکٹر PIMEC/PMSTP شامل تھے۔وفد نے پاکستان انٹرنیشنل میری ٹائم ایکسپو اینڈ کانفرنس کے فروغ اور اسے ملکی و غیر ملکی سرمایہ کاری، بحری تجارت اور میری ٹائم صنعت کے لیے مؤثر پلیٹ فارم بنانے کے حوالے سے بھی اپنی سفارشات پیش کیں۔ملاقات میں اس امر پر زور دیا گیا کہ پاکستان کے وسیع بحری وسائل اور جغرافیائی محل وقوع سے فائدہ اٹھاتے ہوئے میری ٹائم سیکٹر کو ملکی معیشت اور قومی ترقی میں مزید مؤثر کردار ادا کرنے کے قابل بنایا جا سکتا ہے۔