حیدرآباد: سندھ کے شہر حیدرآباد میں واقع ایک سرکاری اسکول نے عالمی سطح پر پاکستان کا نام روشن کرتے ہوئے ورلڈز بیسٹ اسکول پرائزز 2026 میں دنیا کے ٹاپ 10 فائنلسٹس میں جگہ بنا لی۔
ورلڈز بیسٹ اسکول پرائزز کا انعقاد عالمی تعلیمی ادارے T4 Education کی جانب سے کیا جاتا ہے۔ ان اعزازات کا مقصد دنیا بھر کے ایسے تعلیمی اداروں کی حوصلہ افزائی کرنا ہے جو معیاری تعلیم، طلبہ کی فلاح، اختراعی تدریس اور معاشرتی ترقی میں نمایاں کردار ادا کر رہے ہوں۔تعلیم کے شعبے میں معتبر ترین عالمی اعزازات میں شمار کیے جانے والے اس مقابلے میں ہر سال دنیا بھر سے ہزاروں اسکول درخواستیں جمع کراتے ہیں، تاہم سخت جانچ پڑتال کے بعد صرف چند منتخب اداروں کو فائنلسٹ کے طور پر شارٹ لسٹ کیا جاتا ہے۔
رواں سال پاکستان سے صرف دو اسکول اس باوقار عالمی اعزاز کے لیے شارٹ لسٹ ہوئے، جن میں پنجاب کا ایک نجی اسکول اور سندھ کا سرکاری تعلیمی ادارہ شامل ہے۔سندھ کے شہر حیدرآباد میں واقع گورنمنٹ گرلز لوئر سیکنڈری اسکول ٹنڈو میر غلام حسین نے کمیونٹی کولیبریشن کی کیٹیگری میں نمایاں کارکردگی کا مظاہرہ کرتے ہوئے دنیا کے ٹاپ 10 فائنلسٹس میں جگہ بنا کر پاکستان کے لیے ایک اہم اعزاز حاصل کیا ہے۔
صوبائی وزیر تعلیم سید سردار علی شاہ نے اس کامیابی پر اسکول کی انتظامیہ، پرنسپل، اساتذہ، طلبہ، والدین اور مقامی برادری کو مبارکباد دیتے ہوئے کہا کہ یہ کامیابی صرف ایک اسکول کی نہیں بلکہ سندھ کے تعلیمی نظام، سرکاری اسکولوں اور پورے پاکستان کے لیے باعثِ فخر ہے۔انہوں نے اس امید کا اظہار بھی کیا کہ اس کامیابی سے ملک بھر کے سرکاری تعلیمی اداروں کو مزید بہتر کارکردگی دکھانے اور عالمی معیار کی تعلیم کے فروغ کے لیے حوصلہ ملے گا۔