گورنر اسٹیٹ بینک جمیل احمد نے کہا ہے کہ ملک میں مہنگائی بڑھنے کی شرح 7 فیصد تک جانے کا امکان ہے جبکہ رواں مالی سال کے ابتدائی نو ماہ میں معاشی نمو 3.7 فیصد ریکارڈ کی گئی ہے۔
کراچی چیمبر سے خطاب کرتے ہوئے گورنر اسٹیٹ بینک نے کہا کہ آئندہ مالی سال کی دوسری ششماہی میں مہنگائی میں کمی آنا شروع ہو جائے گی۔ انہوں نے بتایا کہ حکومت اور اسٹیٹ بینک چھوٹے اور درمیانے درجے کے کاروباروں (ایس ایم ایز) کی فنانسنگ کو جون 2028 تک 1500 ارب روپے تک لے جانے کے لیے اقدامات کر رہے ہیں۔جمیل احمد کا کہنا تھا کہ ملک میں قرضوں کے حجم میں اضافہ ہوا ہے، اندرونی قرض بڑھا جبکہ بیرونی قرضوں میں کمی لائی گئی ہے۔ انہوں نے کہا کہ برآمدات میں کمی کی ایک بڑی وجہ عالمی معاشی حالات ہیں اور رواں مالی سال میں برآمدی اہداف تقریباً 2 ارب روپے کم رہے۔گورنر اسٹیٹ بینک نے مزید بتایا کہ نئے کرنسی نوٹوں پر کام جاری ہے اور اس حوالے سے حکومت سے منظوری کا عمل بھی جاری ہے۔