اسلام آباد میں سینیٹ کی قائمہ کمیٹی برائے داخلہ نے سابق اراکینِ پارلیمنٹ کو سرکاری (بلیو) پاسپورٹ کی سہولت دینے سے متعلق ترمیمی بل منظور کر لیا۔
تفصیلات کے مطابق سینیٹر عبدالقادر نے ممبرز آف پارلیمنٹ (سیلریز اینڈ الاؤنسز) ترمیمی ایکٹ 2026 کمیٹی میں پیش کیا، جسے غور و خوض کے بعد منظور کر لیا گیا۔
بل کے تحت سابق ارکانِ پارلیمنٹ کو مفت آفیشل (بلیو) پاسپورٹ جاری کرنے کی تجویز دی گئی ہے۔ اس کے علاوہ ان کے شریکِ حیات اور 28 سال سے کم عمر زیرِ کفالت بچوں کو بھی مفت بلیو پاسپورٹ حاصل کرنے کا حق دیا جائے گا۔
بل میں مؤقف اختیار کیا گیا ہے کہ ریٹائرڈ وفاقی سیکریٹریز اور ان کے اہلِ خانہ کو پہلے ہی بلیو پاسپورٹ کی سہولت حاصل ہے، اس لیے سابق ارکانِ پارلیمنٹ کو بھی اسی نوعیت کی سہولت فراہم کرتے ہوئے دونوں کو مساوی حیثیت دی جائے۔
کمیٹی کے اجلاس میں ارکان نے بل کے مختلف پہلوؤں پر تبادلہ خیال کیا، جس کے بعد اسے منظور کر لیا گیا۔ تاہم یہ بل قانون بننے سے قبل پارلیمانی کارروائی کے مزید مراحل سے گزرے گا، جن میں سینیٹ اور قومی اسمبلی سے منظوری اور بعد ازاں صدرِ مملکت کی توثیق شامل ہے۔
بل کی منظوری کے بعد اس پر مختلف سیاسی اور عوامی حلقوں میں بحث کا آغاز ہو گیا ہے۔ بعض حلقے اسے سابق عوامی نمائندوں کے لیے مناسب سہولت قرار دے رہے ہیں، جبکہ بعض ناقدین کا کہنا ہے کہ ایسے معاملات پر قومی وسائل اور مالی اثرات کو بھی مدنظر رکھا جانا چاہیے۔
سابق ارکان پارلیمنٹ کو بلیو پاسپورٹ دینے کا بل قائمہ کمیٹی سے منظور
