آبنائے ہرمز میں ایک کشیدہ واقعے کے دوران ایرانی پاسدارانِ انقلاب کی بحریہ نے ایک کنٹینر جہاز پر فائرنگ کردی، جس کے نتیجے میں جہاز کو شدید نقصان پہنچا۔
برطانوی بحری نگرانی ادارے کے مطابق یہ واقعہ عمان کے شمال مشرق میں تقریباً 15 ناٹیکل میل کے فاصلے پر پیش آیا۔یو کے ایم ٹی او کی جانب سے جاری بیان میں کہا گیا ہے کہ جہاز کے کپتان نے اطلاع دی کہ ایک ایرانی گن بوٹ، جس کا تعلق آئی آر جی سی سے تھا، نے جہاز کے قریب آ کر بغیر کسی پیشگی رابطے کے فائرنگ شروع کردی۔ فائرنگ کے نتیجے میں جہاز کے برج (برج کنٹرول روم) کو شدید نقصان پہنچا۔ادارے کے مطابق واقعے کے باوجود جہاز کے تمام عملے کے ارکان محفوظ رہے اور کسی جانی نقصان کی اطلاع نہیں ملی۔
دوسری جانب ایرانی سرکاری میڈیا نے اس کارروائی کو "قانونی نفاذ” قرار دیا ہے۔ ایرانی افواج کے مرکزی ہیڈکوارٹر کے ترجمان نے فارس نیوز ایجنسی سے گفتگو کرتے ہوئے کہا کہ جب تک امریکا ایران کے لیے جہازوں کی آزادانہ آمدورفت پر عائد پابندیاں ختم نہیں کرتا، آبنائے ہرمز پر سخت کنٹرول برقرار رکھا جائے گا۔ترجمان کا مزید کہنا تھا کہ موجودہ صورتحال جوں کی توں رہے گی اور ایران اپنی سمندری حدود کے تحفظ کے لیے اقدامات جاری رکھے گا۔