ایران اور امریکا کے درمیان امن معاہدے کے بعد پاکستان میں ایرانی ریال کی خرید و فروخت میں نمایاں اضافہ دیکھنے میں آیا ہے، جہاں صرف چار روز کے دوران ملک بھر میں 2 کھرب ایرانی ریال خرید لیے گئے ہیں۔
ایکسچینج کمپنیز ایسوسی ایشن آف پاکستان کے چیئرمین ملک بوستان نے نجی ٹی وی سے گفتگو کرتے ہوئے بتایا کہ ایران اور امریکا کے درمیان معاہدے کے پہلے روز 40 ارب ایرانی ریال کی خریداری ریکارڈ کی گئی تھی، تاہم بعد ازاں اس میں مسلسل اضافہ ہوتا رہا۔انہوں نے کہا کہ تازہ اطلاعات کے مطابق امن معاہدے کے بعد کے چار دنوں میں مجموعی طور پر 2 کھرب ایرانی ریال خریدے جا چکے ہیں، جو سرمایہ کاروں اور کاروباری حلقوں کی بڑھتی ہوئی دلچسپی کی عکاسی کرتا ہے۔
دوسری جانب مارکیٹ میں ایرانی ریال کی طلب میں بھی مسلسل اضافہ ہو رہا ہے، جس کے باعث اس کی قدر میں بہتری دیکھی جا رہی ہے۔ ماہرین کے مطابق ایران اور امریکا کے درمیان کشیدگی میں کمی اور اقتصادی سرگرمیوں کی بحالی کی توقعات کے باعث ایرانی کرنسی میں سرمایہ کاری کا رجحان بڑھ رہا ہے۔