ایران کی پاسدارانِ انقلاب نے امریکا اور اس کے اتحادیوں کو سخت انتباہ دیتے ہوئے کہا ہے کہ اگر موجودہ کشیدگی برقرار رہی تو خطے میں تیل اور گیس کی برآمدات کے اہم راستے بھی خطرے سے دوچار ہو سکتے ہیں۔ ایرانی حکام کے اس بیان نے مشرقِ وسطیٰ میں جاری تنازع اور عالمی توانائی کی ترسیل کے حوالے سے خدشات میں مزید اضافہ کر دیا ہے۔
الجزیرہ کے مطابق پاسدارانِ انقلاب نے اپنے بیان میں کہا کہ اگر ایران پر دباؤ اور فوجی کارروائیاں جاری رہیں تو توانائی برآمد کرنے والے بحری راستے بھی ممکنہ طور پر نشانہ بن سکتے ہیں۔ بیان میں امریکا اور اس کے اتحادیوں کو خبردار کرتے ہوئے کہا گیا کہ خطے کی صورتحال مزید بگڑنے کی ذمہ داری انہی پر عائد ہوگی۔
ایران کے سرکاری نشریاتی ادارے آئی آر آئی بی کے مطابق جاری بیان میں کہا گیا کہ خطے سے توانائی کی برآمدات "یا تو سب کے لیے ہوں گی یا پھر کسی کے لیے بھی نہیں”۔ اس مؤقف کو مبصرین نے اس بات کا اشارہ قرار دیا ہے کہ ایران مستقبل میں بحری جہاز رانی یا توانائی کے بنیادی ڈھانچے سے متعلق مزید اقدامات پر غور کر سکتا ہے۔
دوسری جانب پاسدارانِ انقلاب نے ایک بار پھر آبنائے ہرمز بند رکھنے کے اپنے مؤقف کا اعادہ کرتے ہوئے دعویٰ کیا کہ امریکا اپنی ناکامیوں پر پردہ ڈالنے کے لیے ایرانی فوجی اڈوں کو نشانہ بنا رہا ہے۔
بیان میں امریکی دعوؤں کو بھی مسترد کیا گیا جن میں کہا گیا تھا کہ ایران اہم بحری گزرگاہ سے گزرنے والے جہازوں کو نشانہ بنا سکتا ہے۔ پاسدارانِ انقلاب کا کہنا تھا کہ کسی بھی بحری جہاز نے ایرانی ناکہ بندی کی خلاف ورزی کی کوشش نہیں کی، اس لیے ایران کی جانب سے ان پر حملے کا سوال ہی پیدا نہیں ہوتا۔
ادھر خطے کے کئی خلیجی ممالک نے ایران کی حالیہ کارروائیوں اور بیانات پر تشویش کا اظہار کیا ہے۔ تجزیہ کاروں کے مطابق اگر آبنائے ہرمز میں کشیدگی مزید بڑھی تو عالمی تیل و گیس کی سپلائی، بحری تجارت اور بین الاقوامی منڈیوں پر اس کے نمایاں اثرات مرتب ہو سکتے ہیں۔
ایران کا توانائی کے راستوں پر ممکنہ کارروائی کا انتباہ، امریکا اور اتحادیوں کو سخت وارننگ
