نائب وزیراعظم اور وزیر خارجہ سینیٹر محمد اسحاق ڈار سے آج کویت کے وزیر خارجہ شیخ جراح جابر الاحمد الصباح نے ٹیلیفون پر رابطہ کیا، جس میں خطے کی تازہ صورتحال، جاری کشیدگی اور امن و استحکام سے متعلق امور پر تفصیلی تبادلہ خیال کیا گیا۔
دفتر خارجہ کے مطابق گفتگو کے دوران کویتی وزیر خارجہ نے اپنے ملک پر جاری حملوں پر شدید تشویش کا اظہار کرتے ہوئے امید ظاہر کی کہ تمام فریق تحمل کا مظاہرہ کریں گے اور اسلام آباد مفاہمتی یادداشت (Islamabad MoU) پر مکمل عملدرآمد کو یقینی بنایا جائے گا تاکہ خطے میں مزید کشیدگی سے بچا جا سکے۔
شیخ جراح جابر الاحمد الصباح نے پاکستان کے تعمیری اور مصالحتی کردار کو سراہتے ہوئے کہا کہ پاکستان نے مکالمے کے فروغ اور علاقائی استحکام کے لیے مثبت اور مؤثر سفارتی کوششیں کی ہیں، جنہیں قدر کی نگاہ سے دیکھا جا رہا ہے۔
اس موقع پر نائب وزیراعظم اور وزیر خارجہ اسحاق ڈار نے کہا کہ موجودہ صورتحال میں فوری طور پر کشیدگی میں کمی ناگزیر ہے۔ انہوں نے اس بات پر زور دیا کہ تمام ممالک کی خودمختاری اور علاقائی سالمیت کا احترام کیا جانا چاہیے اور خطے میں امن و سلامتی کو ہر صورت ترجیح دی جانی چاہیے۔
اسحاق ڈار نے مزید کہا کہ اسلام آباد مفاہمتی یادداشت کے تحت طے شدہ جنگ بندی کے وعدوں پر مکمل عملدرآمد ضروری ہے اور ایسے کسی بھی اقدام سے گریز کیا جانا چاہیے جو خطے میں مزید تناؤ یا تصادم کا باعث بنے۔
دونوں وزرائے خارجہ نے اس بات پر اتفاق کیا کہ باہمی دلچسپی کے امور اور خطے کی بدلتی صورتحال پر قریبی رابطہ برقرار رکھا جائے گا تاکہ سفارتی تعاون کے ذریعے امن و استحکام کی کوششوں کو آگے بڑھایا جا سکے۔
یہ رابطہ ایسے وقت میں ہوا ہے جب مشرق وسطیٰ میں جاری کشیدگی کے باعث علاقائی سلامتی کے حوالے سے عالمی سطح پر تشویش پائی جا رہی ہے اور مختلف ممالک سفارتی ذرائع سے تنازع کے پرامن حل کی کوششوں میں مصروف ہیں۔
اسحاق ڈار اور کویتی وزیر خارجہ کا رابطہ، خطے میں کشیدگی کم کرنے پر زور
