اردن کی وزارت دفاع کے مطابق ایران کی جانب سے فائر کیے گئے 10 میزائلوں کو ہوا میں ہی تباہ کردیا ہے-
اردن کی مسلح افواج نے کہا ہے کہ اس کے فضائی دفاعی نظام نے ایران سے داغے گئے متعدد میزائلوں کو کامیابی سے تباہ کر دیامختلف ذرائع میں تعداد مختلف بتائی گئی ہے، جبکہ تازہ ترین رپورٹوں میں 10 ایرانی میزائل مار گرانے کا دعویٰ سامنے آیا ہے۔
اردنی فوج کے مطابق فضائی دفاع نے ایرانی میزائلوں کو اردنی فضائی حدود یا اس کے قریب روک لیا۔ فضائیرروائی میں کوئی جانی نقصان یا مالی نقصان رپورٹ نہیں ہوا،میزائلوں کا ملبہ محفوظ طریقے سے ہٹا دیا گیا ہے.
ایران نے اس سے قبل دعویٰ کیا تھا کہ اس نے خطے میں امریکی اہداف کے خلاف میزائل حملے کیے ہیں، جبکہ اردن کا مؤقف ہے کہ وہ اپنی خود مختا ری اور فضائی حدود کے تحفظ کے لیے کسی بھی ایسے خطرے کو ناکام بناتا رہے گا۔
واضح رہے کہ امریکا کی جانب سے ایران پر مسلسل ساتویں رات فضائی حملوں کے بعد ایران نے ہفتے کے روز خلیجی ممالک میں امریکی اتحادی تنصیبات کو دوبارہ نشانہ بنایا، جس سے خطے میں کشیدگی مزید بڑھ گئی ادھر اقوام متحدہ نے شہری تنصیبات پر حملوں پر شدید تشویش کا اظہار کیا ہے۔
امریکی فوج نے مسلسل ساتویں رات ایران کے فوجی اور لاجسٹک اہداف پر حملے کیے، جس کے جواب میں ایران نے خلیجی ممالک میں امریکی اتحادی تنصیبات پر نئے میزائل اور ڈرون حملے کیے،ایرانی پاسداران انقلاب نے دعویٰ کیا ہے کہ کویت میں امریکی فوج کے معاون مرکز کیمپ عریفجان اور علی السالم ایئر بیس پر واقع ریڈار تنصیب کو نشانہ بنایا گیا، جبکہ ایرانی سرکاری میڈیا کے مطابق بحرین میں شیخ عیسیٰ ایئر بیس اور امریکی انٹیلی جنس ڈیٹا سینٹر پر بھی حملے کیے گئے۔ تاہم ان دعوؤں کی آزادانہ تصدیق نہیں ہو سکی۔
کویت کی وزارت بجلی، پانی اور قابلِ تجدید توانائی کے مطابق ایرانی حملے میں بجلی اور سمندری پانی کو قابلِ استعمال بنانے والے (ڈی سیلینیشن) پلانٹ کو نقصان پہنچا، جبکہ میزائل اور ڈرون خطرات کے باعث کویت انٹرنیشنل ایئرپورٹ پر پروازیں بھی عارضی طور پر معطل کر دی گئیں۔