شہر قائد کراچی میں عیدالاضحیٰ کے موقع پر بھی بیشتر علاقوں کے شہری گیس سے محروم رہے جس کے باعث عوام کو شدید مشکلات کا سامنا کرنا پڑا۔
شہریوں کا کہنا ہے کہ بھاری ٹیکسز اور بل ادا کرنے کے باوجود عید جیسے اہم موقع پر بھی بنیادی سہولت دستیاب نہیں رہی۔
رپورٹس کے مطابق شادمان ٹاؤن، یو پی موڑ، کیماڑی، جیکسن مارکیٹ، شیریں جناح کالونی، اختر کالونی، نارتھ ناظم آباد، لیاقت آباد اور نیو کراچی سمیت مختلف علاقوں میں گیس کی بندش برقرار رہی۔
متاثرہ علاقوں کے مکینوں نے شکایت کی کہ گھروں میں گیس پریشر انتہائی کم نہیں بلکہ پائپ لائنوں میں گیس مکمل طور پر غائب تھی، جس کے باعث کھانا پکانے اور قربانی کے گوشت کی تیاری میں شدید دشواری پیش آئی۔
شہریوں نے کہا کہ عیدالاضحیٰ کے دوران گیس کی ضرورت معمول سے زیادہ ہوتی ہے لیکن اس کے باوجود انہیں مہنگی ایل پی جی استعمال کرنے پر مجبور ہونا پڑا۔
واضح رہے کہ سوئی سدرن گیس کمپنی لمیٹڈ (ایس ایس جی سی) نے عید کے تینوں دن گیس لوڈشیڈنگ نہ کرنے کا اعلان کیا تھا، تاہم متعدد علاقوں کے صارفین اس دعوے سے محروم رہے۔
عوامی حلقوں کا کہنا ہے کہ ملک کے سب سے بڑے تجارتی شہر میں بار بار گیس بحران پیدا ہونا متعلقہ اداروں کی کارکردگی پر سوالیہ نشان ہے۔
شہریوں نے حکومت اور متعلقہ اداروں سے مطالبہ کیا کہ عوام سے بھاری بل اور ٹیکس وصول کرنے کے ساتھ بنیادی سہولیات کی فراہمی بھی یقینی بنائی جائے۔
دوسری جانب بعض علاقوں میں شہریوں نے سوشل میڈیا پر ویڈیوز اور تصاویر شیئر کرتے ہوئے گیس بندش پر شدید احتجاج بھی کیا۔
ماہرین کے مطابق کراچی میں گیس فراہمی کا مسئلہ ہر سال عید اور سردیوں کے موسم میں شدت اختیار کر جاتا ہے، جس کیلئے مستقل اور مؤثر حکمت عملی کی ضرورت ہے۔
عید پر بھی کراچی کے بیشتر علاقوں میں گیس غائب
