پشاور: خیبر گرلز میڈیکل کالج کی ذہین طالبہ قندیل مرتضیٰ نے 17 گولڈ میڈلز حاصل کر کے شاندار ریکارڈ قائم کر دیا، جس پر کانووکیشن ہال تالیوں سے گونج اُٹھا۔
غیر معمولی صلاحیتوں کی حامل طالبہ قندیل مرتضیٰ کا تعلق ہری پور سے ہے اور وہ ایک ٹیلر ماسٹر کی بیٹی ہیں۔ ان کی یہ کامیابی نہ صرف ان کے خاندان بلکہ پورے علاقے کے لیے باعثِ فخر بن گئی ہے۔کانووکیشن تقریب میں قندیل مرتضیٰ کے بعد مقدس نے 10 گولڈ میڈلز حاصل کر کے دوسری جبکہ سبین نے 7 گولڈ میڈلز کے ساتھ تیسری پوزیشن حاصل کی۔
سوشل میڈیا پر وائرل ہونے والی ویڈیوز میں دیکھا جا سکتا ہے کہ جیسے ہی قندیل مرتضیٰ کا نام اسٹیج پر پکارا گیا تو حاضرین نے بھرپور تالیاں بجا کر ان کا استقبال کیا۔ بعد ازاں وزیرِ اعلیٰ خیبر پختونخوا سہیل آفریدی نے انہیں گولڈ میڈلز پہنائے تو ہال ایک بار پھر داد و تحسین سے گونج اُٹھا۔تقریب کے دوران قندیل مرتضیٰ کے والدین کو بھی اسٹیج پر مدعو کیا گیا، جہاں شرکاء نے ان کی جدوجہد اور بیٹی کی کامیابی کو خوب سراہا۔سوشل میڈیا صارفین کی جانب سے بھی قندیل مرتضیٰ کی اس شاندار کامیابی کو بے حد پسند کیا جا رہا ہے، جبکہ صارفین انہیں نوجوانوں کے لیے ایک مثالی شخصیت قرار دے رہے ہیں۔