گوادر پورٹ پر عالمی ٹرانزٹ ٹریفک بڑھانے کے لیے حکومت نے بڑے پیمانے پر مراعات کا اعلان کر دیا، جس کے تحت مختلف ٹیرف اور پورٹ چارجز میں نمایاں کمی کردی گئی ہے۔
وفاقی وزیر پورٹ اینڈ شپنگ جنید انوار چوہدری نے بتایا کہ کنٹینر بردار جہازوں کی برتھنگ فیس میں 25 فیصد کمی کردی گئی ہے، جبکہ ٹرانس شپمنٹ کنٹینرز پر پورٹ چارجز میں 40 فیصد تک رعایت دی گئی ہے۔انہوں نے کہا کہ ٹرانزٹ کنٹینر کارگو پر بھی پورٹ چارجز میں 31 فیصد کمی کی گئی ہے تاکہ عالمی تجارتی سرگرمیوں کو فروغ دیا جا سکے اور گوادر پورٹ کو خطے کے اہم تجارتی مرکز کے طور پر فعال بنایا جا سکے۔وفاقی وزیر کے مطابق جنرل کارگو کے لیے مفت اسٹوریج کی سہولت کو 5 دن سے بڑھا کر ایک ماہ تک کر دیا گیا ہے، جس سے درآمد و برآمد سے وابستہ تاجروں اور شپنگ کمپنیوں کو نمایاں سہولت حاصل ہوگی۔
جنید انوار چوہدری کا کہنا تھا کہ حکومت عالمی ٹرانزٹ ٹریفک کے حصول کے لیے ریکارڈ مراعات فراہم کر رہی ہے اور گوادر کو علاقائی لاجسٹکس ہب بنانے کی پالیسی پر تیزی سے عملدرآمد جاری ہے۔