کنزہ ہاشمی کا گھریلو ملازمین اور مداحوں کی جانب سے ہراسانی کا انکشاف

پاکستانی شوبز انڈسٹری کی اداکارہ کنزہ ہاشمی نے انکشاف کیا ہے کہ انہیں ماضی میں شدید سیکیورٹی خطرات اور ہراسگی کا سامنا کرنا پڑا ہے جس کے بعد لوگوں پر اعتماد کرنا ان کے لیے مشکل ہو گیا۔

اداکارہ کنزہ ہاشمی نے ایک یوٹیوب انٹرویو میں کہا کہ ان کے ساتھ کئی ایسے واقعات ہوئے ہیں جنہوں نے انہیں خوف میں مبتلا کردیا تھا اداکارہ نے بتایا کہ بیرون ملک مقیم ایک خاتون مداح ان کا غیر محسوس طریقے سے تعاقب کرتی تھی حیرانی کی بات یہ ہے کہ اس خاتون نے ان کے گھر کے ملازمین کو پیسوں کا لالچ دے کر اپنے ساتھ ملا لیا تھا۔

کنزہ کے مطابق گھر کے بعض ملازمین نے خفیہ طور پر ان کے گھر، ذاتی اشیاء اور روزمرہ استعمال کی چیزوں کی تصاویر لے کر اس شخص کو بھیجنا شروع کر دیں جب مجھے اس سارے معاملے کا علم ہوا تو میں ان کے موبائل فون چیک کیے وہاں میری تمام تصاویر موجود تھیں، اس کی وجہ سے ہم سب ڈر گئے ہم نے ایکشن لینے کی کوشش کی لیکن بیرون ملک مقیم ہونے کی وجہ سے ہم ان کے خلاف کچھ نہ کرسکے۔

اداکارہ نے کہا کہ جب انہیں اس معاملے کا علم ہوا تو وہ شدید صدمے میں آ گئیں کیونکہ مذکورہ ملازمین کئی برسوں سے ان کے ساتھ کام کر رہے تھے اور ان کا اعتماد جیت چکے تھے وہ ملازمین گزشتہ سات سال سے میرے ساتھ تھےلیکن پھر بھی انہوں نے میرے گھر کی نجی تصاویر اس باہر بیٹھے شخص کو بھیجیں انہوں نے میری چیزوں سے لے کر میری ادویات تک کی عجیب و غریب تصاویر اس شخص کو فراہم کیں میں یہ سب دیکھ کر بالکل دنگ رہ گئی اور اس واقعے کے بعد سے میں اب کسی پر بھی بھروسہ نہیں کر پا رہی ہوں۔

ایک اور واقعے کا ذکر کرتے ہوئے اداکارہ نے بتایا کہ حال ہی میں ایک شخص ان کا پیچھا کرتے ہوئے ان کے ڈرامے کے سیٹ پر پہنچ گیا اور بات یہا ں تک بڑھ گئی کہ وہ شخص ان کے گھر کی عمارت تک بھی پہنچ گیا خوش قسمتی سے اسے اداکارہ کے اپارٹمنٹ کا نمبر معلوم نہیں تھا جس کی وجہ سے وہ ان تک رسائی حاصل نہ کر سکااس صورتحال سے نمٹنے کے لیے اپنے سیٹ پر موجود عملے کی مدد لینا پڑی تب کہیں جا کر اس مداح سےان کی جان چھوٹی-

اداکارہ نے کہا کہ ایسے معاملات میں انسان شدید مایوسی کا شکار ہو جاتا ہے کیونکہ آپ کچھ کر نہیں پاتے اور نہ ہی اس طرح کی چیزوں کے خلاف کوئی باقا عدہ یا سرکاری شکایت درج کروا پاتے ہیں-

کنزہ ہاشمی کے اس انکشاف نے شوبز شخصیات کی نجی زندگی اور ان کی سیکیورٹی کے حوالے سے کئی اہم سوالات کھڑے کر دیے ہیں، جہاں بظاہر نظر آنے والے وفادار ملازمین اور حد سے بڑھے ہوئے مداح فنکاروں کی ذہنی اذیت اور عدم تحفظ کا باعث بن جاتے ہیں۔