وفاقی دارالحکومت میں نجی اسکولوں کے لیے نئے سخت قواعد متعارف کروا دیے گئے ہیں، جن کے تحت اب کوئی بھی پرائیویٹ اسکول ایک ماہ سے زائد ایڈوانس فیس وصول نہیں کر سکے گا۔
پرائیویٹ ایجوکیشنل انسٹی ٹیوشنز ریگولیٹری اتھارٹی (پیرا) نے والدین کے استحصال کو روکنے اور تعلیمی اداروں میں شفافیت لانے کے لیے یہ اہم فیصلہ کیا ہے۔ اتھارٹی نے خبردار کیا ہے کہ قوانین کی خلاف ورزی کرنے والے اسکولوں کو بھاری جرمانے، آڈٹ اور حتیٰ کہ سیل کیے جانے جیسی سخت کارروائیوں کا سامنا کرنا پڑ سکتا ہے۔
پیرا کی جانب سے جاری ہدایات کے مطابق تعلیمی سیشن کے 12 مہینوں سے زائد کسی بھی قسم کی فیس وصول کرنا مکمل طور پر ممنوع قرار دیا گیا ہے۔ اس کے علاوہ والدین سے اضافی، غیر قانونی یا غیر ضروری فیسیں لینے والے اداروں کے خلاف “زیرو ٹالرنس” پالیسی اپنائی جائے گی۔
چیئرمین پیرا ڈاکٹر غلام علی ملاح نے کہا کہ طلبہ اور والدین کا استحصال کسی صورت برداشت نہیں کیا جائے گا۔ ان کا کہنا تھا کہ تعلیمی اداروں کو قانون کے دائرے میں رہ کر کام کرنا ہوگا اور خلاف ورزی کی صورت میں سخت قانونی کارروائی کی جائے گی۔
انہوں نے مزید بتایا کہ والدین کی شکایات کے فوری ازالے کے لیے خصوصی شکایت سیل بھی قائم کر دیا گیا ہے تاکہ عوام اپنی شکایات آسانی سے درج کرا سکیں۔
پیرا نے غیر قانونی طور پر چلنے والے نجی اسکولوں کے خلاف بھی کارروائی کا عندیہ دیتے ہوئے کہا کہ طلبہ کے مستقبل پر کوئی سمجھوتہ نہیں کیا جائے گا اور تمام اداروں کو رجسٹریشن اور قواعد و ضوابط کی پابندی کرنا ہوگی۔
والدین نے اس فیصلے کو خوش آئند قرار دیتے ہوئے کہا ہے کہ بعض نجی اسکول کئی ماہ کی فیس ایڈوانس وصول کرکے والدین پر اضافی مالی دباؤ ڈالتے تھے، جس سے متوسط طبقہ شدید مشکلات کا شکار ہو جاتا تھا۔
نجی اسکولوں پر ایک ماہ سے زائد ایڈوانس فیس لینے پر پابندی
