وفاقی وزیر توانائی اویس لغاری نے دعویٰ کیا ہے کہ حکومت نے ملک بھر میں لوڈشیڈنگ میں نمایاں کمی کر دی ہے اور آئندہ ایک سال کے دوران بجلی بندش کے نظام کو مزید محدود کرتے ہوئے اسے فیڈرز کے بجائے ٹرانسفارمر کی سطح تک لے جایا جائے گا۔
قومی اسمبلی میں خطاب کرتے ہوئے اویس لغاری نے کہا کہ اس وقت ملک بھر میں موجود 14 ہزار فیڈرز میں سے تقریباً 11 ہزار 500 فیڈرز پر زیرو لوڈشیڈنگ ہو رہی ہے، جبکہ صرف 3 ہزار فیڈرز ایسے ہیں جہاں بجلی کی بندش جاری ہے۔
انہوں نے بتایا کہ حکومت بجلی چوری اور نادہندگی کے مسئلے سے نمٹنے کے لیے نئی حکمت عملی پر کام کر رہی ہے۔ ان کے مطابق اب پورے فیڈر کو بند کرنے کے بجائے صرف ان علاقوں کے ٹرانسفارمر بند کیے جائیں گے جہاں بجلی چوری یا بلوں کی عدم ادائیگی کے مسائل موجود ہیں۔
وفاقی وزیر نے کہا کہ اس پالیسی کا مقصد ایمانداری سے بل ادا کرنے والے صارفین کو ریلیف دینا اور بجلی کے نظام کو زیادہ مؤثر بنانا ہے۔
اویس لغاری نے آئی پی پیز کے حوالے سے بھی بات کرتے ہوئے کہا کہ حکومت نے نئے معاہدوں کے بعد تقریباً 3400 ارب روپے کے مالی معاملات بہتر کیے ہیں۔ ان کا کہنا تھا کہ حکومت بجلی کے شعبے میں اصلاحات لانے کے لیے سنجیدہ اقدامات کر رہی ہے تاکہ عوام پر مالی بوجھ کم کیا جا سکے۔
انہوں نے قابلِ تجدید توانائی کے فروغ پر زور دیتے ہوئے کہا کہ حکومت سولر انرجی کی حوصلہ شکنی نہیں کر رہی بلکہ موجودہ پالیسیوں کی وجہ سے ہی ملک میں ہزاروں میگاواٹ سولر انرجی نصب ہوئی ہے۔
وزیر توانائی کا کہنا تھا کہ سولر انرجی کا فروغ ایک مثبت پیش رفت ہے اور اگر کسی پالیسی میں عوام دشمن شق موجود ہے تو اس کی نشاندہی کی جائے تاکہ اس کا جائزہ لیا جا سکے۔
ایک سال میں لوڈشیڈنگ ٹرانسفارمر سطح تک محدود کر دیں گے، اویس لغاری
