اسلام آباد: وفاقی وزیر داخلہ محسن نقوی کی زیر صدارت پاسپورٹ اینڈ امیگریشن ہیڈکوارٹرز میں ایک خصوصی اجلاس منعقد ہوا، جس میں پاسپورٹ نظام میں اصلاحات اور جدید سہولیات کی فراہمی سے متعلق اہم فیصلے کیے گئے۔
اجلاس کے دوران ڈی جی پاسپورٹس اینڈ امیگریشن محمد علی رندھاوا نے وفاقی وزیر داخلہ کو مختلف امور پر تفصیلی بریفنگ دی۔ اجلاس میں پاسپورٹ کے اجراء کے نظام کو مکمل طور پر ای پاسپورٹ پر منتقل کرنے کا اصولی فیصلہ کیا گیا۔اس موقع پر وزیر داخلہ محسن نقوی نے کہا کہ ای پاسپورٹ پر منتقلی سے فراڈ اور جعلسازی کا مؤثر خاتمہ ممکن ہو سکے گا اور پاسپورٹ نظام مزید محفوظ اور جدید بنایا جا سکے گا۔اجلاس میں فیصلہ کیا گیا کہ پریمیم سروسز حاصل کرنے والے شہریوں کو پاسپورٹ کے اجراء پر آنے والے اخراجات کے مطابق فیس ادا کرنا ہوگی۔ بریفنگ کے دوران بتایا گیا کہ بیرون ملک اور ملک کے اندر پاسپورٹ کی ہوم ڈلیوری کے لیے ابتدائی کام مکمل کر لیا گیا ہے اور شہریوں کو پاسپورٹ ان کی دہلیز پر فراہم کرنے کا عمل جلد شروع کیا جائے گا۔
اجلاس میں یکم جولائی سے تمام پاسپورٹ دفاتر میں کیش لیس نظام نافذ کرنے کا بھی فیصلہ کیا گیا، جبکہ آن لائن پاسپورٹ درخواستوں کو پاک آئی ڈی کے پلیٹ فارم پر منتقل کرنے کی منظوری دی گئی۔وزیر داخلہ محسن نقوی نے ہدایت کی کہ بزنس پاسپورٹ سے متعلق پالیسی کو فیڈرل بورڈ آف ریونیو (ایف بی آر) کی مشاورت سے جلد حتمی شکل دی جائے تاکہ کاروباری برادری کو بہتر اور سہل سفری سہولیات فراہم کی جا سکیں۔